-
Mintizro 27
1 Kutani loko kutsremiwe lesvaku hifanela kuwela hiya Italya, vanyikete Pawlu ni vabohiwa van’we ka muzrangeli wa masocha lwavitaniwaka Julyu, wa xikwata xa Aguxtu.
2 Kutani hinhingena ngalaweni ya Adramitu leyi ayijula kusuka yiya mahlalukwini ya xifundzrankulu xa Azya, hitlhava liyendzro, na hili na Arixtarku, mumasedonya wa le Tesalonika.
3 Kutani mundzruku ka kone hitlhasa le Sidoni. Kutani Julyu akhome Pawlu hi mbilu ya wumhunu, amupfumelela kuya ka vanghanu vake lesvaku vamupfuna.
4 Higamiki hiteketa liyendzro, hifamba hi lwandle na hisizreleliwa hi xihlale xa Xipre, hikusa ahibiwa hi timheho.
5 Kutani hitsremakanya lwandle ledzrikulu atlhelweni ka Silisya na Pamfilya, hitlhasa hiyima le Mira wa le Lisya.
6 Kutani loko hi li kone, muzrangeli wa masocha akuma ngalawa leyi ayipfa hi le Alexandriya na yiya Italya, ahinhingenisa ka yone.
7 Kutani antsrhaku ka kuheta masiku ya kutala na hiwela hi kunana, hitlhase le Kinidu hi kukazrateka; kutani loko hivona lesvaku mheho ayihitsrhiki hikhaluta, hiwele na hisizreleliwa hi xihlale xa Kreta lexilavisanaka na Salmoni.
8 Higamiki hitluta hi kukazrateka kusuhi ni le nkingeni wa lwandle, hiyatlhasa ka n’wambangu kuvitaniwaka Mahlaluku Manene, lomu akuli kusuhi ni doropa dzra Lasiya.
9 Kutani akukhalute nkama wa kuhlawa nakone kutani asvi ni nghozi kufamba hi lwandle, hikusa nhambi hi nkama wa kutitsrona svakuda wa Siku dzra Dzrivaleliwo awuhelile. Xilesvo, Pawlu aavabasopisa,
10 aku: “Madoda, nasvivona lesvaku magamu ya liyendzro ledzri matava kuhonekeliwa ni kulahlekeliwa lokukulu, kungali ntsena ka mintsrhwalu ni ngalawa kambe ni ka wutomi bzezru.”
11 Nhambitanu, muzrangeli wa masocha akholwe lesvingahlayiwa hi mufambisi ni n’winyi wa ngalawa amatsrhan’wini ya lesvi Pawlu asvihlayiki.
12 Kutani lesvi hlaluku adzringafaneleki kutsrhama ka dzrone hi wuxika, vanyingi vavone sviyampsa kusuka kone akuva kumbexana vangakota kutlhasa vakhalutisa wuxika le Feniksi, kunga hlaluku dzra Kreta, ledzrilangusiki tlhelo dzra n’walunguwuxa ni nyingitimuwuxa.
13 Kutani loko moya wa nyingitimu wuhunganyana, vapimisa lesvaku vatlhasile lomu avaya kone, vatlakuxa nsimbi ya kukhoma ngalawa, vatluta kusuhi ni le nkingeni wa Kreta.
14 Kambe na kungesikhaluta nkama wungani, moya wa xidzedze lowuvitaniwaka Ewurokilo wuhunga na wuhuma hi le xihlaleni.
15 Kutani wukhoma ngalawa svingakoteki kuyiyenca yikongomana ni moya, hititsrhiketela wuhisusumeta.
16 Kutani hifamba na hisizreleliwa hi xihlale xa xitsrongo lexivitaniwaka Kawda, kambe asvihikazratela kukhoma xibotana xa kulamulela mhangu lexi axikhungiwile.
17 Kambe loko vaxitlakuxetile, vatsrimbelele ngalawa hi mapindzra akuva yitiya, nakone hi kuchava lesvaku ngalawa yingachuka yikhomiwa hi misava ya le Sirtisi, vayehlise matsranga vasusumetiwa hi moya.
18 Kutani lesvi ahibiwa ngopfu hi xidzedze, mundzruku ka kone vasungule kucukumeta mintsrhwalu.
19 Kutani hi siku dzra wuzrazru, hi wusvavu, vacukumete svitizro sva ngalawa.
20 Kutani loko kuhele masiku manyingi na kungavoneki dambu nhambi tinyeleti, na hibiwa hi xidzedze lexikulu, kulavisela hinkwaku ka lesvaku hitahuluka kusungule kuhela.
21 Kutani antsrhaku ka kuheta nkama wa kuleha na kungadiwi nchumu, Pawlu asekeleka ayima amakazri kwavu, aku: “Vavanuna, n’wine inhaka miyingisete lesvi ningamibzela svone, mingasuki Kreta minhingena lwandle. Inhaka mingakumanga kuhonekeliwa ni kulahlekeliwa loku.
22 Kambe svosvi nimitsratsriya lesvaku mitiya timbilu, hikuva kungetilahleka mhunu ni mun’we makazri kwenu, handle ka ngalawa ntsena.
23 Hikusa wusiku bzobzi nihumeleliwe hi ntsrumi ya Xikwembu lexi ninga nandzra wa xone ni lexi nixigandzrelaka,
24 yiku: ‘Ungachavi, Pawlu. Ufanela kuyayima amahlweni ka Khezari. Nakone lavisa, Xikwembu xikunyike hinkwavu lavafambaka hi ngalawa na wene.’
25 Xilesvo, tiyani timbilu, madoda, hikuva nakholwa ka Xikwembu, lesvaku svitayencekisa xisvoxi nibzelisiwiki xisvone.
26 Nhambitanu, hifanela kulahleka hiyahumela ka xihlale xa kukazri.”
27 Kutani loko kutlhase wusiku bza wu-14 na hibiwa hi mavimbi le Lwandle dzra Adriya, amakazri ka wusiku, vafambisi va ngalawa vasungule kupimisa lesvaku ingiki vatsrhindzrekele ka tiko dzra kukazri dzra kuwoma.
28 Kutani vapima kuyenta ka mati, vakuma lesvaku kuyente 36 wa mametru, kutani loko vafambile mpfhukanyana, vatlhela vapima kuyenta ka mati, vakuma 27 wa mametru.
29 Kutani hi kuchava lesvaku hingachuka hiyaba ka mimbangu ya mazribze, vacukumetela mune wa tinsimbi ta kukhoma ngalawa ankileni wa ngalawa, vanavela ingiki bzingoxa hi kukahlula.
30 Kambe loko vafambisi va ngalawa vadzringisa kutimela vasiya ngalawa hi kuxikisa xibotana xa kulamulela mhangu alwandle, na vayenca ingiki hi loko vojula kutsrhiketela tinsimbi ta kukhoma ngalawa hi le nhlokweni ka yone,
31 Pawlu aku ka muzrangeli wa masocha ni le ka masocha: “Loko lava vangatsrhami la ndzreni ka ngalawa, mingetihuluka.”
32 Kutani masocha matsrema mapindzra ya xibotana xa kulamulela mhangu maxitsrhika xiwa.
33 Kutani ankama lowu bziyaka kuxeni, Pawlu atiyisa hinkwavu hi mazritu lesvaku vada svakuda, aku: “Namunhla i siku dzra wu-14 na mili kulanguseleni, na mingadi svakuda ni svitsrongo.
34 Kutani namitsratsriya nili danani svakuda; hikusa svitamitiyisa mihanya, hikuva nhambi nsisi ni wun’we wungetilova atinhlokweni tenu.”
35 Loko ahete kuhlaya lesvo, ateka pawu, akhensa Xikwembu amahlweni kwavu hinkwavu, adzrikhemelela, asungula kuda.
36 Kutani loko hinkwavu vakume ntamu, na vone vasungule kuda svakuda.
37 Kutani hinkwezru ahili abotini ahihamba 276 wa vhanu.
38 Kutani loko vadile vaxuzra, vavevukisa ngalawa hi kucukumeta tirigu alwandle.
39 Kutani loko bzixile, avangavoni tiko dzra kuwoma, kambe vavone nsongo kusuhi ni sava kutani vatibzela kususumeta ngalawa akuva yikhisa kone, loko svikoteka.
40 Kutani vatsrema tinsimbi ta kukhoma ngalawa vatitsrhiketela tipela lwandle, na hi nkama wun’we vatlhantlhelela mapindzra ya svihindzrulo ; kutani vagwimba ntsranga dzra le phambeni dzritakhoma moya, vatlhasa saveni.
41 Kutani loko vatlhasa lomu mati matlhanganaka kone alwandle, ngalawa yikhomiwa hi misava, kutani nhloko yiyima mbangu wun’we, yingapfumeli kusuka, kuvona nkila wa kone wusungula kutsrhoviwa hi mavimbi.
42 Kutani masocha matwanana kudlaya vabohiwa akuva ni mun’we angakoti kuhlambeta atsrutsruma.
43 Kambe lesvi muzrangeli wa masocha aajula kuhuluxa Pawlu, avatsimbe kuyenca lesvi avasvipimisa, aleleta lavakotaka kuhlambeta lesvaku vapfana vapela lwandle vayatlhasa ka misava ya kuwoma,
44 kutani lavasaliki valandzra hi le ntsrhaku, van’we na vali ka mapulangu, van’wana na vali ka minchumu leyingakhatluka ka ngalawa. Kutani hinkwavu vatlhasisa xilesvo amisaveni ya kuwoma na vahanya.