-
Mintizro 6
1 Kutani amasikwini wolawo, ankama lowu nhlayu ya vadondzrisiwa ayiya yiyandzra, vajuda lava avakhanela xigrika vasungule kukhala hi mhaka ya vajuda lava avakhanela xiheberu, hikusa mafelwa yavu amanganyikiwi nchumu loko kuphakeliwa svakuda siku ni siku.
2 Kutani lava 12 vavitana xitsrhungu xa vadondzrisiwa xitsrhindzrekela, vaku: “Ahi svinene kuva hitsrhiketa zritu dzra Xikwembu hiyaphakela svakuda amatafuleni.
3 Xilesvo, vamakwezru, tihlawulelani 7 wa vavanuna lava kuhlayiwaka lesvinene ha vone amakazri kwenu, lavataliki hi moya ni wutlhazri, lesvaku hivabeka akuva valavisela ntizro lowu;
4 kambe hine hitatama hikhinyela akuhambeni ka svikhongoto ni le wutizrelini bza kudondzrisa zritu.”
5 Kutani zritu ledzro dzriyamukeleka ka xitsrhungu hinkwaxu; lesvi, ke, vahlawuliki Stefano, wanuna wa kutala hi lipfumelo ni moya wa kuxwenga, xikan’we na Filipi, Prokoru, Nikanori, Timoni, Parmena na Nikolawu wa le Antiyokiya, lweyi aanhingenisiwe ka xijuda.
6 Vavayisa amahlweni ka vapostola, kutani vavahambela xikhongoto vagama vavatlhanteka mavoko.
7 Kutani zritu dzra Xikwembu dzriya mahlweni dzriyandzra, ni nhlayu ya vadondzrisiwa yiya yikula ngopfu svinene Jerusalema; kutani xitsrhungu lexikulu xa vaprista xisungula kulandzra lipfumelo ledzri.
8 Kutani Stefano, lesvi aatale hi kuzrandzreka ni ntamu, aayenca svihlamaliso lesvikulu ni masingita amakazri ka vhanu.
9 Kambe kuhumelela van’we vavanuna va Sinagoga dzra Lavantsrhunxiwiki, ni van’wana va kuhuma Sireni ni va le Alexandriya, ni va kuhuma le Silisya ni le Azya vasungula kuphikisana na Stefano.
10 Kambe avasvikotanga kutiyisela amahlweni ka wutlhazri ni moya lowu aavulavula ha wone.
11 Kutani vaxava vhanu axihundleni akuva vaku: “Himuyingele na akhanela minchumu ya kuzruka Moxe ni Xikwembu.”
12 Kutani vahlohlotela xitsrhungu, vakulu ni vatsrali, vamutela, vamukhoma hi nkanu vamuyisa amahlweni ka Huvo ya Xijuda.
13 Kutani vahumexa timboni ta madzrimi, tiku: “Mhunu lweyi angatsrhiki kuhlayetela minchumu ya kuzruka mbangu lowu wa kuxwenga ni Nawu.
14 Hikuva himuyingele na aku Yesu wa le Nazareta atahohlota mbangu lowu acinca ni mikhuva leyi Moxe ahisiyeliki yone.”
15 Kutani loko hinkwavu lava avatsrhame Hubzeni ya Xijuda vamulangutisisa, vavona wuso bzake na bzifana ni wuso bza ntsrumi.