BRN

1   Mpfuletelo wa Yesu Kriste, lowu Xikwembu ximunyikiki wone, akuva akomba malandzra yake minchumu leyifanelaka kuyenceka kungali khale. Kutani awukombise hi svifaniso lesvi asvizrumeliki nandzra wake Johani hi kutizrisa ntsrumi yake.

2   Johani adzrungule zritu dzra Xikwembu ni wumboni bza Yesu Kriste, ka hinkwasvu lesvi asvivoniki.

3   Nyonxani ka lweyi adondzraka ni lavayingelaka mazritu ya wuprofeta lebzi, ni lavahlayisaka minchumu leyitsraliwiki ka bzone, hikusa nkama lowubekisiwiki wu kusuhi.

4   Mine Johani nitsralela mabandla ya 7 lamanga ka xifundzrankulu xa le Azya, niku: Niminavelela wumbilu ni kuzrula lesvipfaka ka lweyi anga kone, lweyi aali kone ni lweyi ataka, ni lesvipfaka ka mimoya ya 7 leyinga mahlweni ka xitsrhamu xake xa wuhosi,

5   ni lesvipfaka ka Yesu Kriste, “Mboni ya Kudumbeka”, “Mativula ya Vafi”, ni “Mufumi wa Tihosi ta Misava.” Ka lweyi ahizrandzraka, lweyi atlheliki ahintsrhunxa asvidohweni svezru hi kutizrisa ngati ya ka kwake,

6   aviki ahiyenca mfumu ni vaprista va Xikwembu xake ni Tatana wake, ka yene akuyisiwe lidzrumu ni ntamu hi la kungahelikiki. Amen.

7   Lavisani! Awata hi matlavi nakone matihlo hinkwawu matamuvona, kupatsra ni lava vangamutlhava; kutani tinxaka hinkwatu ta misava titatiba svifuva hi mhaka yake. Hakunene! Amen!

8   “Hi mine Alfa na Omega”, kuhlaya Jehovha Xikwembu, “Lweyi anga kone, ni lweyi aali kone ni lweyi ataka, Lwe wa Ntamu Hinkwawu.”

9   Mine Johani, makwenu ni nakuloni andzreni ka mahlomulo, ni le ka mfumu, ni le ka kutiyisela xikan’we na Yesu, anili xihlaleni lexivitaniwaka Phatimosi hi mhaka ya zritu dzra Xikwembu ni wumboni bza Yesu.

10   Moya wuniyise asikwini dzra Hosi, kutani niyingela zritu ledzrikulu dzra kufana ni dzra xipalapala antsrhaku kwanga,

11   na dzriku: “Lesvi usvivonaka, svitsrale abukwini usvizrumelela mabandla laya 7 le Efesa, Smirna, Pergamu, Tiyatira, Sarda, Filadelfiya, ni le Lawodikiya.”

12   Kutani nindzruluka akuva nivona lweyi aakhanela na mine. Kutani loko nindzrulukile, nivone 7 wa svikhomamotsre sva gole,

13   nakone amakazri ka svikhomamotsre akuli ni mhunu wa kufana ni N’wana wa Mhunu, na ayambale nkhancu wa kugamela minkondzrweni atlhela atsrimba xifuva hi bandhi dzra gole.

14   Nakone nhloko ni misisi yake asvibase svikubaa kufana ni voya bza tihamba ta kubasa, svikubaa kufana ni xitsrhwatsrhwa; kutani matihlo yake amafana ni langavi ledzripfuzraka,

15   kasi minkondzro yake ayifana ni nsuku lowa kuvangama, svanga hi loko wuphatimisiwa hi ndzrilo wa kuhisa tinsimbi; kutani zritu dzrake adzrifana ni mpfumawulu wa mati lamanyingi.

16   Nakone avokweni dzrake dzra xinene aa ni tinyeleti ta 7, kasi anon’wini wake akuhuma lipanga dzra kuleha ni dzra kutsremana, dzra kuloteka hala ni hala, kutani liso dzrake adzrifana ni dambu loko dzriphatima hi ntamu svinene.

17   Kuteloko nimuvona, niwela minkondzrweni yake svanga mhunu lwafiki. Kutani atlhanteka voko dzrake dzra xinene ahenhla kwanga, aku: “Ungachavi. Hi mine Lwewa Kusungula ni Lwewa Wugamu,

18   ni Lwahanyaka. Anifile, kambe hi mine lweyi! Nihanya hi la kungahelikiki, funtsrhi ni ni mimpfungulu ya lifu ni ya Sizra.

19   Xilesvo, tsrala minchumu leyi uyivoniki, ni leyinga kone, ni leyitakahumelela antsrhaku ka leyi.

20   Xihundla xa tinyeleti leta 7 leti utivoniki avokweni dzranga dzra xinene ni 7 wa svikhomamotsre hi lexi: Tinyeleti ta 7 i tintsrumi ta 7 wa mabandla, nakone 7 wa svikhomamotsre i 7 wa mabandla.