-
Mpfuletelo 11
1 Kutani ninyikiwa lihlanga dzra kufana ni nhonga, na ntsrumi yiku: “Sekeleka upima mbangu wa kuxwenga wa tempele dzra Xikwembu ni alitari ni lavagandzrelaka ka dzrone.
2 Kambe tsrhika qgeke dzra le handle ka mbangu wa kuxwenga wa tempele; ungadzripimi, hikusa dzrinyikiwe va matiko, kutani vatakandzretela doropa dzra kuxwenga kudzringana 42 wa tihweti.
3 Kutani nitanyika timboni tanga letibidzri ntamu wa kuprofeta kudzringana 1.260 wa masiku na tiyambale masaka.”
4 Timboni leti i minhlwazri yibidzri ni svikhomamotsre svibidzri lesviyimiki amahlweni ka N’winyi wa misava.
5 Loko mhunu ajula kuvavisa timboni leti, kuhuma ndzrilo aminon’wini ya tone wuheta valala va tone. Kutani hi svosvo titakamudlayisa xisvone mhunu, loko ajula kutivavisa.
6 Ti ni ntamu wa kupfala tilo akuva kungani mpfula andzreni ka masiku lawa tiprofetaka ha wone, nakone ti ni ntamu ahenhla ka mati akuva timandzruluta mava ngati, ni wa kuba misava hi mixaka hinkwayu ya makhombo hi la tinavelaka ha kone.
7 Kutani loko titava na tihetile wumboni bza tone, xihazri xa nhova lexitlhantukaka hi le xidziveni xitalwa na tone xitihlula, xiva xitidlaya.
8 Kutani mintsrumbu ya tone yitatsrhikiwa axitaratwini xa doropa ledzrikulu ledzri hi kufanekisela dzrivitaniwaka Sodoma na Gibita, lomu Hosi na yone yigongondzreliwiki kone amhandzreni.
9 Kutani vhanu va matiko ni va tinxaka ni tindzrimi ni tinhlonge vatahlalela mintsrumbu ya tone kudzringana masiku mazrazru ni hamfu; vangetipfumelela lesvaku mintsrumbu ya tone yilahliwa asizreni.
10 Kutani lavatsrhamaka amisaveni vatanyonxa hi mhaka ya tone, vaba mavoko; vatazrumelelana ni svihiwa, hikusa vaprofeta lavabidzri avaxanisa lavahanyaka amisaveni.
11 Kutani antsrhaku ka masiku mazrazru ni hamfu, moya wa wutomi lowupfaka ka Xikwembu wunhingena andzreni kwavu, kutani vayima hi minenge yavu, kutani nchavu lowukulu wuwela lava vavavoniki.
12 Kutani vayingela zritu ledzrikulu dzripfa atilweni, dzriku ka vone: “Tlhantukelani halenu.” Kutani vatlhantukela atilweni hi tlavi, kutani valala vavavona.
13 Kutani hi nkama wolowo kuhumelela kutsrekatsreka lokukulu ka misava, kutani xiyenge xa khume xa doropa xiwa; kutani 7. 000 wa vhanu vadlawa hi kutsrekatsreka ka misava, kutani lavasaliki vachava, vadzrumisa Xikwembu xa tilo.
14 Khombo dzra wubidzri dzrikhalutile. Lavisani! Khombo dzra wuzrazru dzrabuya hi kukahlula.
15 Kutani ntsrumi ya wuntlhanu na tibidzri yichaya xipalapala xa yone. Kutani kuva ni mazritu lamakulu atilweni, maku: “Mfumu wa misava svosvi i Mfumu wa Hosi yezru ni Kriste wa yone, kutani atafuma hi masiku ni masiku.”
16 Kutani vakulu lava 24 lavatsrhamiki amahlweni ka Xikwembu asvitsrhan’wini svavu sva wuhosi vawa hi mimombo yavu vagandzrela Xikwembu,
17 vaku: “Hakukhensa, wene Jehovha Xikwembu, Lwewa ntamu hinkwawu, lweyi anga kone ni lweyi aali kone, hikusa uteke ntamu waku lowukulu nakone usungule kufuma.
18 Kambe matiko mahlundzrukile, ni mahlundzru yaku matlhasile, ni wo nkama waku lowubekisiwiki wutlhasile wa kuva vafi vayavanyisiwa ni wa kuhakela malandzra yaku, vanga vaprofeta, ni vhanu lavaxwengiki, ni lavachavaka vito dzraku, lavatsrongo ni lavakulu, ni wa kuhelisa lavahelisaka misava.”
19 Kutani mbangu wa kuxwenga wa tempele dzra Xikwembu atilweni wupfuleka, areka dzra xipfumelelanu xa xone dzrivoniwa ambangwini wa kuxwenga wa tempele dzra xone. Kutani tilo dzrihatima, kutwala ni mazritu; na dzrone tilo dzridzruma, kutlhela kuva ni kutsrekatsreka ka misava ni xihangu lexikulu.