BRN

1   Kutani kuvoneka singita ledzrikulu atilweni: Mun’we wansati aayambale dambu, nakone hansi ka minkondzro yake aku ni n’weti, na nhlokweni yake ku ni ngiyana ya 12 wa tinyeleti,

2   na hala funtsrhi a ni nyimba. Kutani aatlomba hi kulun’wa ni kutwa kuvavisa ka kuphuluka.

3   Kutlhela kuvoneka singita dzrin’wana atilweni. Kuhumelela lesvaku aku ni dragona ledzrikulu dzra kuzuka, dzra 7 wa tinhloko ni 10 wa timhondzro na tinhlokweni ta dzrone ku ni 7 wa tingiyana;

4   kutani nkila wa dzrone wukoka xiyenge xa wuzrazru xa tinyeleti ta le tilweni, wuticukumetela amisaveni. Kutani dragona dzrikutsetsezrele amahlweni ka wansati lweyi aajula kuphuluka, lesvaku loko aphuluka, dzritakota kuda n’wana wake!

5   Kutani aphuluka n’wana wa jaha, lweyi atakabzisa matiko hinkwawu hi nhonga ya nsimbi. Kutani n’wanake awutliwa ayisiwa ka Xikwembu ni ka xitsrhamu xa wuhosi xa xone.

6   Kutani lweyo wansati atsrutsrumela ahuleni, lomu anga ni mbangu lowululamisiwiki hi Xikwembu ni lomu avatamuphamela kone kudzringana 1.260 wa masiku.

7   Kutani kupfuka yimpi atilweni: Mikayele ni tintsrumi take valwa na dragona, kutani dragona ni tintsrumi ta dzrone valwa,

8   kambe dragona ni tintsrumi take vahluliwa, kuva kungahakumiwi mbangu wa kuva vangahatsrhama atilweni.

9   Kutani dzricukumetisiwa xisvosvo dragona ledzrikulu, yinga nyoka ya le kusunguleni, leyivitaniwaka Diyavulosi na Sathana, lweyi akanganyisaka misava hinkwayu. Dzricukumeteliwa hansi amisaveni, ni tintsrumi ticukumeteliwa hansi xikan’we na dzrone.

10   Kutani niyingela zritu ledzrikulu atilweni dzriku: “Svosvi kutlhase huluku ni ntamu ni Mfumu wa Xikwembu xezru ni ntamu wa Kriste wa xone, hikusa mulumbeti wa vamakwezru acukumeteliwe ahansi, lweyi avalumbetaka nhlikanhi ni wusiku amahlweni ka Xikwembu xezru!

11   Kutani vamuhlulile hi ngati ya Xihambana ni hi kola ka zritu dzra wumboni bzavu, nakone avazrandzranga wutomi bzavu nhambiloko valavisane ni lifu.

12   Xilesvo, nyonxani, n’wine matilo na n’wine mitsrhamaka ka wone! Yowee n’wine misava ni lwandle, hikusa Diyavulosi amixikelile, na ahlundzruke ngopfu svinene, hi kutiva lesvaku a ni nkama wa kugoma.”

13   Kutani loko dragona dzrivone lesvaku dzricukumeteliwe ahansi amisaveni, dzrihlongolisa wansati lweyi angaphuluka n’wana wa jaha.

14   Kambe lweyo wansati anyikiwa timpapa tibidzri ta gama ledzrikulu, akuva akota kuhaha aya le mananga ambangwini wake, lomu afanelaka kudisiwa kone kudzringana nkama ni minkama ni hamfu ya nkama na ali kule ni lomu nyoka yinga kone.

15   Kutani nyoka yikampfula mati ya kufana ni nambu anon’wini wa yone antsrhaku ka lweyo wansati, kuyencela lesvaku atakokiwa hi nambu, afa.

16   Kambe misava yibuya yilamulela lweyo wansati; kutani misava yipfula nomu wa yone yimita nambu lowu dragona dzriwukampfuliki hi nomu wa dzrone.

17   Kutani dragona dzrihlundzrukela lweyo wansati dzriva dzrisuka dzrifamba, dzriyalwa ni lavasaliki va vana vake, lavabekisaka svileleto sva Xikwembu ni lavanga ni ntizro wa kubeka wumboni bza Yesu.