BRN

1   Kutani nite nilangusa, novona Xihambana na xiyime Nhaveni ya Ziyoni, na xi ni lava 144.000, lavanga ni vito dzra xone ni vito dzra Tatana wa xone ledzritsraliwiki amimombzeni ya vone.

2   Kutani niyingela pongwe na dzrihuma hi le tilweni dzra kufana ni pongwe dzra mati lamanyingi ni dzra kufana ni kudzruma lokukulu ka tilo. Kutani pongwe ledzri ningadzriyingela adzrifana ni dzra vachayi va svitende loko vachaya svitende svavu.

3   Kutani avayimbelela sva kutsrhama ingiki i lisimu ledzrimpsha amahlweni ka xitsrhamu xa wuhosi ni le mahlweni ka mune wa svivumbiwa lesvihanyaka ni ka vakulu. Nakone akungali na mhunu lwakotaka kudondzra lisimu ledzro handle ka lava 144.000, lavaxaviwiki amisaveni.

4   Lava hi lavakalaka vangatinyamisanga hi vavasati; hikusa i tinghwendzra letibasiki. Lava hi lava valandzraka Xihambana kwini na kwini lomu xiyaka kone. Vaxaviwe amakazri ka vhanu svanga mihandzru ya kusungula ya Xikwembu ni ya Xihambana,

5   nakone akukumiwanga madzrimi aminon’wini yavu; ava na xisolo.

6   Nigama nivona yin’wana ntsrumi na yihaha amakazri ka tilo, na yi ni madzrungula lamanene lamangahelikiki akuva yimatwalisa ka lavatsrhamaka amisaveni, ka vhanu va tinhlonge hinkwatu, ni tinxaka hinkwatu, ni tindzrimi hinkwatu, ni matiko hinkwawu,

7   na yihlaya lesvi hi zritu ledzrikulu: “Chavani Xikwembu, mixidzrumisa, hikusa wutlhasile nkama wa xone wa kuyavanyisa. Xilesvo gandzrelani Lweyi ayenciki tilo ni misava, ni lwandle, ni svihlovo sva mati.”

8   Kutani yin’wana ntsrumi, ya wubidzri, yilandzrela, yiku: “Awile! Awile Babilona Lwenkulu, yene lweyi anwisiki vhanu va matiko hinkwawu vhinyu dzra mahlundzru ya wugangu bzake!”

9   Kutani kulandzrela yin’wana ntsrumi, ya wuzrazru, yihlaya lesvi hi zritu ledzrikulu: “Loko mhunu agandzrela xihazri xa nhova ni xifaniso xa xone, atlhela ayamukela xifungu xa xone amombzeni wake kumbe avokweni dzrake,

10   na yene atanwa vhinyu dzra mahlundzru ya Xikwembu lamachululiwaka na mangatimuliwanga axinwelweni xa wukazri bza xone, nakone ataxanisiwa hi ndzrilo ni marilana amahlweni ka tintsrumi leta kuxwenga, ni le mahlweni ka Xihambana.

11   Kutani ximusi xa kuxanisiwa kwavu xitlhantuka hi masiku ni masiku, nakone nhlikanhi ni wusiku avawisi lavagandzrelaka xihazri xa nhova ni xifaniso xa xone ni mun’wana ni mun’wana lwayamukelaka xifungu xa vito dzra xone.

12   Hi la kujulekaka kone kutiyisela ka vhanu va Xikwembu lava kuxwenga, lavabekisaka svileleto sva Xikwembu ni lavakhomelelaka alipfumelweni dzra Yesu.”

13   Kutani niyingela zritu dzrihuma atilweni, dzriku: “Tsrala: Nyonxani ka vafi lavafelaka Hosini kusukela ka svosvi! Moya wuli: ‘Ina, avawise amintizrweni yavu leya kubindzra, hikuva mintizro yavu yavalandzra!”

14   Kutani nite nilangusa, novona tlavi dzra kubasa, na lweyi atsrhamiki ka tlavi dzra kone ali wa kufana ni N’wana wa Mhunu, na a ni ngiyana ya gole anhlokweni ni sikela dzra kutsrema svinene avokweni dzrake.

15   Kutani kuhumelela ntsrumi yin’wana hi le mbangwini wa kuxwenga wa tempele, na yibandlukana hi zritu ledzrikulu ka lweyi atsrhamiki atlavini, yiku: “Nhingenisa sikela dzraku utsrhovela, hikusa nkama wutlhasile wa kutsrhovela, hikuva ntsrhovelo wa misava wuwupfile.”

16   Kutani lweyi atsrhamiki atlavini acukumetela sikela amisaveni, kutani misava yitsrhoveliwa.

17   Kutani ntsrumi yin’wana yihumelela hi le mbangwini wa kuxwenga wa tempele ledzringa tilweni, na yi ni sikela dzra kutsrema svinene na yone.

18   Kutlhela kuhumelela ntsrumi yin’wana hi le alitarini, na yi ni ntamu wa kulawula ndzrilo. Kutani yibandlukana ka lweyi anga ni sikela dzra kutsrema svinene hi zritu ledzrikulu, yiku: “Nhingenisa sikela utsrema svipha sva mvhinya wa misava, hikuva mavhinya ya yone mawupfile.”

19   Kutani ntsrumi yicukumetela sikela amisaveni, yihlengeleta mavhinya ya misava, yimacukumetela axikamelweni lexikulu xa mavhinya ya mahlundzru ya Xikwembu.

20   Kutani mavhinya mapfuviwa axikamelweni ahandle ka doropa, kutani kuhuma ngati axikamelweni, ya kuyatlhasa ka matomu ya mahanxi hi mpfhuka wa kuya ka 296 wa makilometru.