BRN

1   Kutani yin’we ya tintsrumi leta 7 leti ati ni svibza lesva 7 yinibuyela, yiku: “Buya nikukomba kuyavanyisiwa ka nghwavana leyikulu leyitsrhamisiki ahenhla ka mati lamanyingi,

2   leyi tihosi ta misava tiyenciki wugangu na yone, ni leyi lavatsrhamaka amisaveni vapopsiki hi vhinyo dzra wugangu bza yone.”

3   Kutani yinitlakula hi moya yiniyisa amananga. Kutani nivona mun’we wansati na atsrhame ahenhla ka xihazri xa nhova xa muvala wa kuzuka, lexitaliki hi mavito ya svizruku ni lexi axi ni 7 wa tinhloko ni 10 wa timhondzro.

4   Kutani lweyo wansati aayambale timpahla ta nkuxe ni ta kuzuka, atlhela atixongisa hi gole ni mazribze ya lisima ni tindzralama, na avokweni dzrake atamele xinwelo xa gole, lexi axitale hi minchumu ya kunyenyentsa ni nsila ya wugangu bzake.

5   Kutani amombzeni wake akutsraliwe vito, ledzringa xihundla, ledzriliki: “Babilona Lwenkulu, mamana wa tinghwavana ni wa minchumu ya kunyenyentsa ya misava.”

6   Nigama nivona lweyo wansati na apopse hi ngati ya vhanu va Xikwembu lava kuxwenga ni hi ngati ya timboni ta Yesu. Kutani loko nimuvona, nikunkaa hi kuhlamala lokukulu.

7   Kutani ntsrumi yiku ka mine: “Uhlamalela yini? Nitakubzela xihundla xa lweyo wansati ni xa xihazri xa nhova leximuzrwalaka, ni lexinga ni 7 wa tinhloko ni 10 wa timhondzro:

8   Xihazri xa nhova lexi uxivoniki xive kone, kambe axahali kone, kambe xi kusuhi ni kuhuma hi le xidziveni, xiya akuhelisiweni. Kutani vayaki va misava, lava mavito yavu mangatsraliwangakiki abukwini dzra wutomi kusukela akusunguliweni ka misava, vatahlamala hi kuvona xihazri xa nhova lexiviki kone kambe xingeheke kone, kambe xitakatlhela xiva kone.

9   “Lani kujuleka nhloko leyinga ni wutlhazri: 7 wa tinhloko i 7 wa tinhava, leti lweyo wansati atsrhamaka ahenhla ka tone.

10   Kutani ku ni 7 wa tihosi: Ntlhanu wa tone tiwile, yin’we yi kone, kutani leyin’wana ayisitlhasa; kambe loko yitlhasa, yitafanela kutsrhama nkamanyana.

11   Kutani xihazri xa nhova lexi axi li kone kambe xingeheke kone, na xone i hosi ya wu-8, kambe yihuma ka leta 7, nakone yiya akuhelisiweni.

12   “Timhondzro leta 10 leti utivoniki i 10 wa tihosi letingikisama tiyamukela mfumu kambe tiyamukelaka ntamu svanga tihosi kudzringana wora dzrin’we ni xihazri xa nhova.

13   Ti ni miyanakanyu yin’we; titanyika xihazri xa nhova ntamu wa tone ni wuhosi bza tone.

14   Titalwa ni Xihambana, kambe Xihambana xitatihlula hikusa i Hosi ya Tihosi ni Mufumi wa Vafumi. Na vone lavayimaka na xone, lavavitaniwiki, lavahlawuliwiki ni lavadumbekaka, vatahlula.”

15   Kutani ntsrumi yiku ka mine: “Mati lawa umavoniki, lawa lwewa nghwavana atsrhamaka ahenhla ka wone, i vhanu va matiko hinkwawu, ni va svitsrhungu hinkwasvu, ni va tinhlonge hinkwatu ni va tindzrimi hinkwatu.

16   Kutani timhondzro ta 10 leti utivoniki ni xihazri xa nhova, titanyenya lweyo wa nghwavana, timusiya na ali xisiwana, na angayambalanga nchumu, tida nyama yake tiva timuhisa hi ndzrilo apsha.

17   Hikuva Xikwembu xinhingenise atimbilwini ta tone kuhetisisa nkongometo wa xone, akuva tilandzra nkongometo wun’we hi kunyika mfumu wa tone xihazri xa nhova, kuko kuhetiseka mazritu ya Xikwembu.

18   Kutani wansati lweyi ungamuvona i doropa ledzrikulu ledzringa ni mfumu ahenhla ka tihosi ta misava.”