BRN

1   Antsrhaku ka lesvi, niyingela lesvi asvitwala ingiki i zritu dzrikulu dzra xitsrhungu lexikulu atilweni, na xibandlukana, xiku: “Haleluya! Huluku, ni lidzrumu, ni ntamu i sva Xikwembu xezru,

2   hikusa mayavanyisela ya xone i ya ntiyiso nakone malulamile. Hikuva xiyavanyise nghwavana leyikulu leyingahona misava hi wugangu bza yone, nakone xidzrihisele ngati ya malandzra ya xone leyinga mavokweni ya yone.”

3   Kutani xitsrhungu xiphindha, xiku: “Haleluya! Kutani ximusi xitlhantukela ahenhla hi masiku ni masiku.”

4   Kutani vakulu lava 24 ni mune wa svivumbiwa lesvihanyaka vawela hansi, vagandzrela Xikwembu lexitsrhamaka axitsrhan’wini xa wuhosi, vaku: “Amen! Haleluya!”

5   Kutani kuhuma zritu hi le xitsrhan’wini xa wuhosi, dzriku: “Dzrumisani Xikwembu xezru, hinkwenu malandzra ya xone mixichavaka, lavatsrongo ni lavakulu.”

6   Kutani niyingela lesvi asvitwala ingiki i zritu dzra xitsrhungu lexikulu ni sva kufana ni pongwe dzra mati lamanyingi, ni sva kufana ni pongwe dzra kudzruma lokuchavisaka ka tilo, sviku: “Haleluya, hikusa Jehovha Xikwembu xezru, Lwewa Ntamu Hinkwawu, asungule kufuma!

7   Ahinyonxeni, hinyonxisisa, himudzrumisa, hikusa muchatu wa Xihambana wutlhasile, na yene nsati wa xone atilulamiselile.

8   Kutani anyikiwe kuyambala linyu ledzra hombe dzra kuphatima ni dzra kubasa, hikuva linyu ledzra hombe i mintizro ya kululama ya vhanu va Xikwembu lava kuxwenga.”

9   Kutani aku ka mine “Tsrala: Nyonxani ka lavazrambiwaka ankhubzini wa muchatu wa Xihambana!” Atlhela aku ka mine: “Lawa i mazritu ya ntiyiso ya Xikwembu.”

10   Kutani niwela amahlweni ka minkondzro yake na nijula kumugandzrela. Kambe aku ka mine: “Tivonele! Ungayence lesvo! Nova nandzrakuloni ntsena ni wa vamakwenu lavabekaka wumboni bza Yesu. Gandzrela Xikwembu! Hikuva moya wuhuhutele wuprofeta akuva kubekiwa wumboni bza Yesu.”

11   Kutani nivona tilo na dzripfulekile, kutani lavisani! Aku ni hanxi dzra kubasa. Kutani lweyi atsrhamiki ka dzrone avitaniwa Lwadumbekaka ni wa Ntiyiso, nakone ayavanyisa atlhela alwa yimpi hi kululama.

12   Matihlo yake i langavi dzra ndzrilo, nakone anhlokweni yake ku ni tingiyana letinyingi. A ni vito ledzritsraliwiki, ledzri kungeke na mhunu lwadzritivaka handle kwake ntsena,

13   nakone ayambale xiyambalu lexihlambiki hi ngati, nakone avitaniwa hi vito ledzriliki “Zritu dzra Xikwembu”.

14   Nakone aalandzriwa hi makhandzra atilweni na mali ka mahanxi ya kubasa, na mayambale linyu ledzra hombe dzra kuphatima ni dzra kubasa.

15   Nakone anon’wini wake kuhuma lipanga dzra kuleha ni dzra kutsremana, lesvaku aba ha dzrone matiko, nakone atamabzisa hi nhonga ya nsimbi. Nakone apfuva mavhinya ya kuhamba vhinyo dzra mahlundzru lamakulu ya Xikwembu, Lexa Ntamu Hinkwawu.

16   Nakone axiyambalwini xake, ni le ntsrhumbini wake, a ni vito ledzritsraliwki, ledzriliki: “Hosi ya Tihosi” ni “Mufumi wa Vafumi”.

17   Nitlhela nivona ntsrumi yin’we na yiyime adambzini, yibandlukana hi zritu ledzrikulu, yiku ka tinyanyana hinkwatu letihahaka amakazri ka tilo: “Buyani mihlengeletana, mitada xilalelo lexikulu xa Xikwembu,

18   akuva mida nyama ya tihosi ni nyama ya tihosi ta masocha ni nyama ya vhanu lava ntamu ni nyama ya mahanxi ni ya lavatsrhamiki ka wone, ni nyama ya hinkwavu, lavantsrhunxekiki xikan’we ni ya malandzra, ni ya lavatsrongo ni ya lavakulu.”

19   Kutani nivona xihazri xa nhova ni tihosi ta misava ni makhandzra ya tone na mahlengeletanile akuva malwa ni lweyi atsrhamiki ahanxini ni khandzra dzrake.

20   Kutani xihazri xa nhova xikhomiwa, xikan’we ni muprofeta wa madzrimi lweyi aayenca masingita amahlweni ka xone, lawa aakanganyisa ha wone lavayamukeliki xifungu xa xihazri xa nhova ni lava avagandzrela xifaniso xa xone, vacukumeteliwa na vahahanya, hi wubidzri bza vone, ativeni dzra ndzrilo ledzripfuzraka hi marilana.

21   Kambe lavasaliki vadlayiwa hi lipanga dzra kuleha dzra lweyi atsrhamiki ahenhla ka hanxi ledzri adzrihuma anon’wini wake. Kutani tinyanyana hinkwatu tixuzra hi nyama yavu.