BRN

1   Kutani nivona ntsrumi yin’we na yixika hi le tilweni na yi ni mpfungulu wa xikhele xa xidziva ni chini ledzrikulu avokweni dzra yone.

2   Kutani yikhoma dragona, nyoka ya le kusunguleni, lweyi anga Diyavulosi na Sathana, yidzritsrimba kudzringana 1.000 wa malembe.

3   Yigama yidzricukumetela axidziveni, yixipfala yiva yisemendhela ahenhla ka dzrone, akuva dzringahakanganyisi matiko kuko kuhela 1.000 wa malembe. Antsrhaku ka lesvi dzrifanela kuntsrhunxiwa sva nkamanyana.

4   Nigama nivona svitsrhamu sva wuhosi. Kutani kutsrhamisa vhanu ka svone, vava vanyikiwa ntamu wa kuyavanyisa, anga mahika ya lavatsremiwiki tinhloko hi mhaka ya wumboni bza Yesu ni hi mhaka ya zritu dzra Xikwembu, lava funtsrhi vakalaka vangagandzrelanga xihazri xa nhova kumbe xifaniso xa xone nhambi kupfumela kubekeliwa xifungu amimombzeni yavu kumbe avokweni dzravu. Kutani vatlhela vahanya vava vafuma na Kriste kudzringana 1.000 wa malembe.

5   (Vafi lavasaliki avatlhelanga vahanya kuko kuhela malembe laya 1.000.) Loku i kupfuka loka kusungula.

6   Nyonxani, funtsrhi xwengani ka mhunu lwanyikiwaka kupfuxiwa loka kusungula! Lifu dzra wubidzri adzri na ntamu ahenhla ka lava, kambe vatava vaprista va Xikwembu ni va Kriste, nakone vatafuma na yene kudzringana 1.000 wa malembe.

7   Kutani loko kuhela 1.000 wa malembe, Sathana atantsrhunxiwa ajele dzrake,

8   kutani atahuma ayakanganyisa matiko lamanga ka mune wa makhona ya misava, Goge wa Magoge, kumahlengeleta akuva mapfuxa yimpi. Nhlayu yavu yitale kufana ni sava dzra lwandle.

9   Kutani vachololoka ahenhla ka misava hinkwayu, vayima amatlhelweni hinkwawu ya nxaxa wa vhanu va Xikwembu lava kuxwenga ni ya doropa ledzrizrandzriwaka. Kambe kuxika ndzrilo hi le tilweni wuvaheta.

10   Kutani Diyavulosi, lweyi aavakanganyisa, acukumeteliwa ativeni dzra ndzrilo ni marilana, lomu aku li ni xihazri xa nhova ni muprofeta wa madzrimi; kutani vataxanisiwa nhlikanhi ni wusiku hi masiku ni masiku.

11   Kutani nivona xitsrhamu xa wuhosi xa kubasa ni Lweyi atsrhamiki ka xone. Amahlweni kwake misava ni tilo asvitsrutsruma, kungakumiwi mbangu wa kuva svitsrhama ka wone.

12   Kutani nivona vafi, lavakulu ni lavatsrongo, na vayime amahlweni ka xitsrhamu xa wuhosi, kutani mabuku mapfuliwa. Kambe kupfuliwa ni buku dzrin’wana, dzringa buku dzra wutomi. Kutani vafi vayavanyisiwa hi minchumu leyitsraliwiki amabukwini hi kuya hi mintizro yavu.

13   Kutani lwandle dzrihumexa vafi lava avali ka dzrone, ni lifu ni Sizra svihumexa vafi lava avali ka svone, kutani vayavanyisiwa ha mun’wemun’we hi kuya hi mintizro yake.

14   Kutani lifu ni Sizra svicukumeteliwa ativeni dzra ndzrilo. Tiva dzra ndzrilo i lifu dzra wubidzri.

15   Kutani loko mhunu angakumiwanga na atsraliwe abukwini dzra wutomi acukumeteliwa ativeni dzra ndzrilo.