BRN

1   Kutani nivona tilo ledzrimpsha ni misava leyimpsha; hikusa tilo ledzra kusungula ni misava leya kusungula asvihundzrile; ni lwandle adzrehe kone.

2   Nitlhela nivona doropa ledzra kuxwenga, Jerusalema Lwemumpsha, na dzrixika hi le tilweni dzripfa ka Xikwembu na dzrilulamiseliwe svanga mutekiwa lwatixongiseliki nuna wake.

3   Kutani niyingela zritu ledzrikulu dzrihuma axitsrhan’wini xa wuhosi, dzriku: “Lavisani! Tende dzra Xikwembu dzri le vhanwini, nakone xitatsrhama navu, kutani vatava tiko dzra xone. Kutani Xikwembu hi ntshima xitava na vone.

4   Nakone xitasula minyembeti hinkwayu amatihlweni yavu; kutani lifu dzringehetiva kone, nhambi nkosi ni svidzrilo, ni kutwa kuvavisa, svingehetiva kone, hikusa lesva kusungula svikhalutile.”

5   Kutani Lweyi atsrhamisiki axitsrhan’wini xa wuhosi aku: “Lavisani! Niyenca hinkwasvu sviva lesvimpsha.” Atlhela aku: “Tsrala, hikuva mazritu lawa madumbeka nakone i ya ntiyiso.”

6   Agama aku ka mine: “Svihetisekile! Hi mine Alfa na Omega, masungulu ni wugamu. Lweyi anga ni tozra, nitamunyika mati ya svihlovo sva mati ya wutomi hi mahala.

7   Lweyi ahlulaka atada pfindla dzra minchumu leyi, nakone nitava Xikwembu xake, na yene atava n’wananga.

8   Kambe loko mali matoya, ni lavangeke na lipfumelo, ni lava kunyenyentsa ansileni yavu, ni vadlayi, ni vhanu va wugangu, ni lavatizraka hi timitsru ni mimoya, ni lavagandzrelaka svithombe, ni vahembi hinkwavu, lexi vatakakuma xone i tiva ledzripfuzraka hi ndzrilo ni marilana. Lesvi i lifu dzra wubidzri.”

9   Kutani kuhuma yin’we ya tintsrumi leta 7 leti ati ni 7 wa svibza lesvi asvitale hi makhombo laya 7 ya wugamu, yiku ka mine: “Buya nikukomba mutekiwa, nsati wa Xihambana.”

10   Kutani yinitlakula hi moya yiniyisa ka nhava leyikulu ni ya kutlakuka, yinikomba doropa ledzra kuxwenga, Jerusalema, na dzrixika hi le tilweni, dzripfa ka Xikwembu,

11   na dzri ni kuphatima ka Xikwembu. Kuvaninga ka dzrone akufana ni ka zribze ledzra lisima ngopfu, kufana ni zribze dzra jaxpe ledzriphatimaka svanga krixtali,

12   na dzri ni phangu ledzrikulu ni dzra kutlakuka ledzringa ni 12 wa tinyangwa ni 12 wa tintsrumi atinyangweni, nakone atinyangweni ta kone akutsraliwe mavito ya 12 wa tinxaka ta vana va Yisrayele.

13   Hi le wuxeni aku ni tinyangwa tizrazru, le n’walungu tinyangwa tizrazru, ni le nyingitimu tinyangwa tizrazru, ni le mpeladambu tinyangwa tizrazru.

14   Nakone phangu dzra doropa adzri ni 12 wa mazribze ya masungulu, funtsrhi ka wone aku ni 12 wa mavito ya 12 wa vapostola va Xihambana.

15   Kutani lweyi aavulavula na mine aatamele lihlanga dzra gole dzra kupima ha dzrone, akuva apima doropa ni tinyangwa ta dzrone ni phangu dzra dzrone.

16   Kutani doropa dzriyakiwe ahenhla ka mune wa makhona, nakone kuleha ka dzrone kudzringana ni kuyanama ka dzrone. Kutani apima doropa hi lihlanga, 2.200 wa makilometru; kuleha ka dzrone ni kuyanama ka dzrone ni kutlakuka ka dzrone kafana.

17   Atlhela apima phangu dzra dzrone, 65 wa mametru; mpimu wa mhunu wa nyama, hi wo mpimu wa ntsrumi.

18   Kutani phangu adzriyakiwe hi jaxpe, nakone doropa adzrihambiwe hi gole dzra kubasa, kufana ni vhidru dzra kuvonekela.

19   Masungulu ya phangu dzra doropa amaxongiseliwe hi mixaka hinkwayu ya mazribze ya lisima: laya kusungula amali ya jaxpe, laya wubidzri amali ya safira, laya wuzrazru amali ya kalsedoni, laya wumune amali ya xjimeralda,

20   laya wuntlhanu amali ya sardoniksi, laya wu-6 amali ya sardu, laya wu-7 amali ya krizolite, laya wu-8 amali ya berilu, laya wu-9 amali topazu, laya wu-10 amali ya krizopraze, laya wu-11 amali ya jasintu, laya wu-12 amali ametixta.

21   Nakone tinyangwa leta 12 atili 12 wa tindzralama; yin’wana ni yin’wana ya tinyangwa ayihambiwe hi ndzralama yin’we. Nakone xitaratu xa doropa axili xa gole dzra kubasa, kufana ni vhidru dzra kuvonekela.

22   Anivonanga tempele ka dzrone, hikuva Jehovha, Xikwembu xa Ntamu Hinkwawu, hi yene tempele dzra dzrone, na xone Xihambana.

23   Kutani doropa adzringavileli dambu kumbe n’weti kudzrivaningela, hikuva kuphatima ka Xikwembu akudzrivaningela, nakone livaningo dzra dzrone akuli Xihambana.

24   Kutani matiko matafamba hi livaningo dzra dzrone, nakone tihosi ta misava titadzribuyisela kuphatima ka tone.

25   Tinyangwa ta dzrone tingetipfaliwa ni kan’we ni nhlikanhi, hikuva wusiku bzingetiva kone ambangwini lowo.

26   Kutani vatadzritisela kuphatima ni xichavu xa matiko.

27   Kambe kone kungaka kunganhingeni xin’wana ni xin’wana lexinyamiki ni lavayencaka sva kunyenyentsa ni lava kuhemba; ntsena kutanhingena lavatsraliwiki abukwini dzra wutomi dzra Xihambana.