BRN

1   Kutani yinikomba nambu wa mati ya wutomi ya kuvonekela ingi i krixtali, lowusukelaka axitsrhan’wini xa wuhosi xa Xikwembu ni xa Xihambana,

2   wuyawela amakazri ka xitaratu xa doropa. Atlhelweni ledzri ni ledzrin’wana dzra nambu aku ni minsinya ya wutomi leyipsalaka 12 wa mixaka ya mihandzru, leyipsalaka mihandzru ya yone hweti ni hweti. Kutani matluka ya minsinya amatizrela kudaha matiko.

3   Kutani kungehetitlhela kahazrukiwa mhunu ni mun’we. Kambe xitsrhamu xa wuhosi xa Xikwembu ni xa Xihambana xitava ka dzrone, nakone malandzra ya xone mataxitizrela;

4   nakone matavona wuso bza xone, ni vito dzra xone dzritava mimombzeni ya wone.

5   Nakone, kungehetiva na wusiku, funtsrhi vangehetivilela livaningo dzra motsre kumbe livaningo dzra dambu, hikuva Jehovha Xikwembu atavavaningela, kutani vatafuma hi masiku ni masiku.

6   Yigama yiku ka mine: “Mazritu lawa madumbeka nakone i ya ntiyiso. Nakone Jehovha, Xikwembu lexihuhutelaka vaprofeta, azrume ntsrumi yake akuva yikomba malandzra yake minchumu leyifanelaka kuyenceka hi kukahlula.

7   Lavisani! Nibuya hi kukahlula. Nyonxani ka mhunu lweyi abekisaka mazritu ya wuprofeta bza buku ledzri!”

8   Kutani mine, Johani, hi mine niyengeliki nitlhela nivona minchumu leyi. Kutani loko niyiyingelile nitlhela niyivona, niwele hansi na nijula kugandzrela aminkondzrweni ya ntsrumi leyinikombiki minchumu leyi.

9   Kambe yiku ka mine: “Tivonele! Ungayence lesvo! Nova ntsena nandzrakuloni ni wa vamakwenu, vaprofeta ni wa lavabekisaka mazritu lamanga bukwini ledzri. Gandzrela Xikwembu!”

10   Yitlhela yiku ka mine: “Ungamapfaleli mazritu ya wuprofeta bza buku ledzri, hikuva nkama lowubekisiwiki wu kusuhi.

11   Lweyi angalulamangakiki aatame angalulami, ni lwewa nsila aatame ahanya hi nsila; kambe lwewa kululama aatame ayenca lesva kululama, ni lwewa kuxwenga aatame ava wa kuxwenga.

12   “‘Lavisani! Nibuya hi kukahlula, nakone hakelo dzranga dzri na mine, akuva nihakela mun’wana ni mun’wana hi kuya hi ntizro wake.

13   Hi mine Alfa na Omega, Lwewa Kusungula ni Lwewa Wugamu, Masungulu ni Wugamu.

14   Nyonxani ka lavahlampsaka sviyambalu svavu, lesvaku vava ni mfanelo ya kuya ansinyeni wa wutomi ni lesvaku vanhingena adoropeni hi tinyangwa ta dzrone!

15   Le handle ku ni timbzana, ni lavatizraka hi timitsru ni mimoya, ni vhanu va wugangu, ni vadlayi, ni vagandzreli va svithombe, ni hinkwavu lavazrandzraka madzrimi vatlhela vahanya hi kuhemba.’

16   “‘Mine, Yesu, nizrumele ntsrumi yanga kumibekela wumboni mayelanu ni timhaka leti amabandleni. Hi mine limitsru ni lixaka dzra Davhida, ni nyeleti ya mixo leyiphatimaka.’”

17   Kutani moya ni mutekiwa vali: “Tana!” Ni lweyi asviyingelaka aahlaye, aku: “Tana!” Ni lweyi anga ni tozra aate; lweyi asvinavelaka aateke mati ya wutomi hi mahala.

18   “Nibeka wumboni ka mani na mani lwayingelaka mazritu ya wuprofeta bza buku ledzri: Loko mhunu ayengetela ka minchumu leyi, Xikwembu xitamuyengetelela makhombo lamatsraliwiki abukwini ledzri;

19   nakone loko mhunu asusa sva kukazri ka mazritu ya buku dzra wuprofeta lebzi, Xikwembu xitasusa yavelo dzrake ansinyeni wa wutomi ni le doropeni ledzra kuxwenga, lesvitsraliwiki abukwini ledzri.

20   “Lweyi abekaka wumboni bza timhaka leti ali: ‘Ina, nabuya hi kukahlula.’” “Amen! Tana, Hosi Yesu.”

21   Wumbilu bza Hosi Yesu abzive ni vhanu va Xikwembu lava kuxwenga!