-
Mpfuletelo 3
1 “Tsralela ntsrumi ya bandla dzra le Sarda, uku: Ahlaya lesvi lweyi anga ni mimoya ya 7 ya Xikwembu ni 7 wa tinyeleti: ‘Nayitiva mintizro yaku, lesvaku u ni vito dzra lesvaku wahanya, nakuve ufile.
2 Tsrhama hi kuvonelela, utiyisa lesvisaliki lesvinga kusuhi ni kufa, hikuva mintizro yaku aniyikumanga na yihelelile amahlweni ka Xikwembu xanga.
3 Xilesvo, dzrimuka lesvi usviyamukeliki ni lesvi usviyingelisiki xisvone. Kutani svibekise, utisola. Hikusa loko ungavoneleli, nitata kufana ni muyivi, kutani ungetiwutiva nkama lowu nitakakutela ha wone.
4 “‘Nhambitanu, u ni vhanu vangali vangani le Sarda lavakalaka vanganchimisanga sviyambalu svavu, kutani lava vatafambafamba na mine na vayambale sviyambalu sva kubasa, hikusa svavafanela.
5 Lweyi atakahlula atayambexiwa sviyambalu sva kubasa hi ndlela yoleyo, kutani mine ningaka ningatimi vito dzrake abukwini dzra wutomi, kambe nitahlaya lesvaku nadzritiva vito dzrake amahlweni ka Tatana wanga ni le mahlweni ka tintsrumi take.
6 Lweyi anga ni tindleve aayingele lesvi moya wusvibzelaka mabandla.’
7 “Tsralela ntsrumi ya bandla dzra le Filadelfiya, uku: Ahlaya lesvi lweyi axwengiki ni lweyi anga wa ntiyiso, lweyi anga ni mpfungulu wa Davhida, lweyi apfulaka kungavi na mhunu lwapfalaka, ni lweyi apfalaka kungavi na mhunu lwapfulaka:
8 ‘Nayitiva mintizro yaku. Lavisa! Nibeke amahlweni kwaku nyangwa leyekemphaa, leyi kungeke na mhunu lwangayipfalaka, hikusa nhambilesvi unga ni ntamu wutsrongo, uhlayise zritu dzranga nakone awulandzrulanga vito dzranga.
9 Lavisa! Nitanyikela lavanga va sinagoga dzra Sathana, lavaliki i vajuda nakuve ahi vone, kambe vokohemba. Lavisa! Nitavatisa vatatakhinsama amahlweni ka minkondzro yaku, vatasvitiva lesvaku nakuzrandzra.
10 Lesvi uhlayisiki zritu dzra kutiyisela kwanga, na mine nitakuhuluxa ka nkama wa ndzringo lowujulaka kuwela misava hinkwayu, akuva wudzringa lavatsrhamaka ka yone.
11 Nata hi kukahlula. Khomelela ka lesvi unga nasvu, akuva kungavi na mhunu lwakutekelaka ngiyana yaku.
12 “‘Lweyi atakahlula nitamuhamba nsika ya temple dzra Xikwembu xanga, kutani angaka angahasuki ka dzrone, nakone nitatsrala ahenhla kwake vito dzra Xikwembu xanga ni vito dzra doropa dzra Xikwembu xanga, Jerusalema Lwemumpsha, ledzrixikaka hi le tilweni ka Xikwembu xanga, ni vito dzranga ledzrimpsha.
13 Lweyi anga ni tindleve aayingele lesvi moya wusvibzelaka mabandla.’’
14 “Tsralela ntsrumi ya bandla dzra le Lawodikiya, uku: Ahlaya lesvi Amen, mboni ya kudumbeka ni ya ntiyiso, masungulu ya wutumbuluxi bza Xikwembu:
15 ‘Nayitiva mintizro yaku, lesvaku awutitimeti funtsrhi awuhisi. Mawaku loko awutitimeta kumbe uhisa.
16 Kutani, lesvi wokokufumela, ungahisikiki kumbe kutitimeta, nitakuthuka anon’wini wanga.
17 Hikusa uli: “Mine ni xigogo nakone lani ninga kone netala hi minchumu, funtsrhi anipfumali nchumu”, kambe awusvivoni lesvaku u n’wambuyangwana, uchelana wusiwana nakone u xisiwana, awuvoni, funtsrhi awuyambalanga nchumu.
18 Nikukuca lesvaku uxava kwanga gole ledzriphatimisiwiki hi ndzrilo akuva uva xigogo; ni sviyambalu sva kubasa akuva uyambala, akuva tingana ta wusveti bzaku tingetivoneka; ni muzri wa matihlo akuva utota matihlo, utakota kuvona.
19 “‘Hinkwavu lava nivazrandzraka navakhwavela niva nivatshinya. Xilesvo hiseka, utisola.
20 Lavisa! Ni kola axipfalwini nigongondzraka. Loko mhunu ayingela zritu dzranga apfula xipfalu, nitanhingena andlwini yake nida naye, na yene ada na mine.
21 Lweyi atakahlula nitamunyika kutsrhamisa na mine axitsrhan’wini xanga xa wuhosi, svanga hesvi na mine nihluliki niva nitsrhamisa ni Tatana wanga axitsrhan’wini xake xa wuhosi.
22 Lweyi anga ni tindleve aayingele lesvi moya wusvibzelaka mabandla.’”