BRN

1   Antsrhaku ka lesvi, nite nilangusa, novona xipfalu xekemphaa atilweni! Kutani zritu dzra kusungula ledzri ningadzriyingela na dzrikhanela na mine adzrifana ni xipalapala, dzriku: “Tlhantukela halenu, nitakukomba lesvifanelaka kuyenceka.”

2   Kolanu, nitekiwa hi moya. Kutani kukumeka lesvaku akubekiwe xitsrhamu xa wuhosi atilweni, ni lweyi atsrhamiki axitsrhan’wini xa kone!

3   Mavonekela ya lweyi atsrhamiki axitsrhan’wini xa wuhosi amafana ni ya zribze dzra jaxpe ni zribze dzra sardu, nakone hinkwaku amatlhelweni ka xitsrhamu xa wuhosi aku ni nkwangulatilo wa kufana ni xjimeralda.

4   Hinkwaku amatlhelweni ka xitsrhamu xa wuhosi aku ni 24 wa svitsrhamu sva wuhosi, nakone asvitsrhan’wini lesvi sva wuhosi nivone na kutsrhame 24 wa vakulu na vayambale sviyambalu sva kubasa, na tinhlokweni tavu va ni tingiyana ta gole.

5   Hi le xitsrhan’wini xa wuhosi akuhuma kuhatima ka tilo, ni mazritu, ni kudzruma ka tilo; nakone aku ni 7 wa mimotsre ya ndzrilo leyipfuzraka amahlweni ka xitsrhamu xa wuhosi, yinga 7 wa mimoya ya Xikwembu.

6   Kutani amahlweni ka xitsrhamu xa wuhosi aku ni xa kufana ni lwandle dzra vhidru, xa kutsrhama ingiki i krixtali. Kutani amakazri ka xitsrhamu xa wuhosi ni le matlhelweni ka xitsrhamu xa wuhosi aku ni mune wa svivumbiwa lesvihanyaka, lesvi asvitale hi matihlo amahlweni ni le ntsrhaku.

7   Kutani xivumbiwa xa kusungula lexihanyaka axifana ni nghonyama; kutani xivumbiwa xa wubidzri lexihanyaka axifana ni xinkuzana; kutani xivumbiwa xa wuzrazru lexihanyaka axi ni wuso bza kufana ni bza mhunu; kutani xivumbiwa xa wumune lexihanyaka axifana ni gama ledzrihahaka.

8   Kutani svivumbiwa lesvihanyaka sva mune, xin’wana ni xin’wana xa svone axi ni 6 wa timpapa; nakone asvitale hi matihlo hinkwaku amatlhelweni ni le ndzreni. Kutani nhlikanhi ni wusiku svihlaya na svingayimi, sviku: “Axwengile, axwengile, axwengile Jehovha Xikwembu, Lwewa Ntamu Hinkwawu, lweyi aali kone, lweyi anga kone, ni lweyi ataka.”

9   Kutani nkama wini na wini lowu svivumbiwa lesvihanyaka sviyisaka lidzrumu ni xichavu, ni svikhenso, ka Lweyi atsrhamiki axitsrhan’wini xa wuhosi, anga Lweyi ahanyaka hi masiku ni masiku,

10   vakulu lava 24 vawela hansi amahlweni ka Lweyi atsrhamiki axitsrhan’wini xa wuhosi, vagandzrela Lweyi ahanyaka hi masiku ni masiku, vava vacukumetela tingiyana tavu amahlweni ka xitsrhamu xake xa wuhosi, vaku:

11   “Svakufanela, Jehovha, Xikwembu xezru, kunyikiwa lidzrumu, ni xichavu, ni ntamu, hikusa utumbuluxe minchumu hinkwayu, nakone yive kone yitlhela yitumbuluxiwa hi kola ka kuzrandzra kwaku.”