BRN

1   Kutani, axineneni xa Lweyi atsrhamiki axitsrhan’wini xa wuhosi, nivone mukhwepa lowutsraliwiki amatlhelweni ha mabidzri, na wupfaliwile, wulemiwa hi 7 wa svinameko.

2   Kutani nivona ntsrumi yin’we leya ntamu na yibandlukana hi zritu ledzrikulu, yiku: “Hi mani lweyi afaneliwaka hi kupfula mukhwepa lowu, akwamula ni svinameko sva wone?”

3   Kambe akuvanga na mhunu atilweni kumbe la hansi amisaveni lweyi aakota kupfula mukhwepa kumbe kulangusa andzreni ka wone.

4   Kutani nidzrila ngopfu svinene hilesvi akungali na mhunu ni mun’we lweyi aafaneliwa hi kupfula mukhwepa kumbe kuvona lesvinga ndzreni ka wone.

5   Kambe mun’we wa vakulu aku ka mine: “Ungadzrili. Lavisa! Nghonyama ya lixaka dzra Juda, limitsru dzra Davhida, yihlulile, akuva yipfula mukhwepa ni 7 wa svinameko sva wone.”

6   Kutani nivona na makazri ka xitsrhamu xa wuhosi ni le ka mune wa svivumbiwa lesvihanyaka, ni le makazri ka vakulu, kuyime xihambana lexi axivoneka ingiki xitlhaviwile xifa, na xi ni 7 wa timhondzro ni 7 wa matihlo, nakone matihlo ya kone i 7 wa mimoya ya Xikwembu leyizrumeliwiki amisaveni hinkwayu.

7   Kutani xitekela kutsrhindzrekela kusuhinyana xiyamukela mukhwepa avokweni dzra xinene dzra Lweyi atsrhamiki axitsrhan’wini xa wuhosi.

8   Loko xiyamukele mukhwepa lowuyani, svivumbiwa sva mune lesvihanyaka ni 24 wa vakulu vawela hansi amahlweni ka Xihambana, kutani mun’wana ni mun’wana wa vone aa ni xitende ni svibza sva gole lesvi asvitale hi muzri wa kunun’hwela. (Muzri wa kunun’hwela i svikhongoto sva lava kuxwenga.)

9   Kutani vayimbelela lisimu ledzrimpsha, vaku: “Svakufanela kuyamukela mukhwepa ni kupfula svinameko sva wone, hikuva utlhaviwile ufa nakone hi ngati yaku uxavele Xikwembu vhanu lavahumaka ka tinxaka hinkwatu, ni tindzrimi hinkwatu, ni svitsrhungu hinkwasvu, ni matiko hinkwawu,

10   nakone uvayence tihosi ni vaprista va Xikwembu xezru, kutani vatafuma ahenhla ka misava.”

11   Kuteloko nilangusa, noyingela pongwe dzra mazritu ya tintsrumi ta kutala amatlhelweni ka xitsrhamu xa wuhosi ni svivumbiwa lesvihanyaka ni vakulu, nakone nhlayu ya tone ayili madzanadzana ya madzanadzana ni makumekume ya madzana.

12   Kutani atihlaya lesvi hi zritu ledzrikulu: “Xihambana lexingatlhaviwa xifa xafaneliwa hi kunyikiwa ntamu, ni wukosi, ni wutlhazri, ni wukulu, ni xichavu, ni lidzrumu, ni kukhensiwa.”

13   Kutani niyingela svivumbiwa hinkwasvu le tilweni ni le misaveni, ni le hansi ka misava ni le lwandle, ni minchumu hinkwayu leyinga ka svone, yiku: “Kukhensiwa ni xichavu, ni lidzrumu, ni ntamu asviyisiwe ka Lweyi atsrhamiki axitsrhan’wini xa wuhosi ni le ka Xihambana hi masiku ni masiku.”

14   Kutani svivumbiwa lesvihanyaka asviku: “Amen!” Kutani vakulu vawela hansi vagandzrela.