BRN

1   Nigama nivona loko Xihambana xipfula xin’we xa 7 wa svinameko, niva niyingela xin’we xa mune wa svivumbiwa lesvihanyaka na xihlaya lesvi hi zritu dzra kutsrhama ingiki i kudzruma ka tilo: “Tana!”

2   Nite nilangusa, novona hanxi dzra kubasa! Kutani lweyi aatsrhame ka dzrone aa ni ligubu; kutani anyikiwa ngiyana ya wuhosi, ahuma na ahlula ava ayaheta kuhlula kwake”

3   Loko xipfule xinameko xa wubidzri, niyingele xivumbiwa xa wubidzri lexihanyaka, na xiku: “Tana!”

4   Kutani kuhuma hanxi dzrin’wana dzra muvala wa kuzuka, kutani lweyi atsrhamiki ka dzrone anyikiwa ntamu wa kususa kuzrula amisaveni akuva vhanu vadlayanana; anyikiwa ni lipanga ledzrikulu.

5   Loko xipfula xinameko xa wuzrazru, niyingela xivumbiwa xa wuzrazru lexihanyaka, na xiku: “Tana!” Nite nilangusa, novona hanxi dzra ntima! Kutani lweyi atsrhamiki ka dzrone aa ni xikalu xa kupima svakuda avokweni dzrake.

6   Kutani niyingela lesvi asvitwala ingiki i mpfumawulu wa zritu makazri ka mune wa svivumbiwa lesvihanyaka na sviku: “Kilu dzrin’we dzra tirigu i denari ni makilu mazrazru ya sevhada i denari. Ungatlangi hi mafuzra ni vhinyo.”

7   Loko xipfula xinameko xa wumune, niyingela zritu dzra xivumbiwa lexihanyaka xa wumune, na dzriku: “Tana!”

8   Nite nilangusa, novona hanxi dzra kunkwalala! Ni lweyi atsrhamiki ka dzrone aa ni vito dzra Lifu, kutani aalandzriwa hi Sizra. Kutani anyikiwa ntamu ahenhla ka xiyenge xa wumune xa misava, akuva adlaya hi lipanga dzra kuleha, ni hi ndlala, ni hi ntungu, ni hi svihazri sva nhova sva misava.

9   Loko xipfula xinameko xa wuntlhanu, nivona ahansi ka alitari mahika ya lavadlayiwiki hi mhaka ya zritu dzra Xikwembu ni hi mhaka ya wumboni lebzi vabzinyikeliki.

10   Kutani mabandlukana hi zritu ledzrikulu, maku: “Utatsrhika kuyatlhasa siku muni, Hosi Leyikulu, ya kuxwenga ni ya ntiyiso, kuyavanyisela ni kudzrihisela ngati yezru ka lavatsrhamaka amisaveni?”

11   Kutani mun’wana ni mun’wana wa vone anyikiwa nkhancu wa kubasa, vabzeliwa kuwisanyana kutsrongo kuko kutlhangana nhlayu ya malandzrakulobze ni vamakwavu lava avayimela kudlayiwa svanga ha vone vadlayiwiki.

12   Kutani nilangusa loko xihambana xipfula xinameko xa wu-6, kutani kuhumelela kutsrekatsreka lokukulu ka misava! Kutani dambu dzrihamba dzra ntima kufana ni saka dzra kutsrindzra dzra nkosi, ni n’weti hinkwawu wuhamba ingiki i ngati,

13   kutani tinyeleti ta tilo tiwela amisaveni svanga hi loko nkuwa wuhlakahliwa hi moya lowukulu kuhululeka makuwa ya wone ya mambisi.

14   Kutani tilo dzrisuka hi kusongana kufana ni mukhwepa lowusongiwaka, kutani tinhava hinkwatu ni svihlale hinkwasvu svisuka ambangwini wa svone.

15   Kutani tihosi ta misava, ni lavakulu, tihosi ta masocha, svigogo, lava ntamu, ni svikazrawa hinkwasvu, ni vhanu hinkwavu lavantsrhunxekiki, vatumbela atimhakweni ni le makazri ka mazribze ya tinhava.

16   Kutani vabzela tinhava ni mazribze, vaku: “Hiwelani mihifihla amahlweni ka wuso bza Lweyi atsrhamiki axitsrhan’wini xa wuhosi ni le mahlundzrwini ya Xihambana,

17   hikusa siku ledzrikulu dzra mahlundzru yavu dzritlhasile; kutani i mani angadzritiyelaka?”