-
Tito 2
1 Kambe wene vulavula minchumu leyitwananaka ni dondzro leyinene.
2 Vavanuna lavakulu vafanela kutsrhama na vangapopsanga, vava ni xinthunzi, vayenca minchumu ya kutwisiseka, vava vahanya ha hombe alipfumelweni ni le lizrandzrwini, ni le kutiyiseleni.
3 Na vone vavasati lavakulu, vafanela kuva ni mahanyela ya xichavu, vangazrandzri kuhanya hi mahlevo, vangavi lavafumiwaka hi bzala bza bzinyingi, vava vadondzrisi va lesvinga svinene,
4 akuva vakota kudondzrisa vavasati lavatsrongo kuzrandzra vanuna vavu ni vanavu,
5 kuva lavayencaka minchumu ya kutwisiseka, kuva lavabasiki, kuva lavativaka kuhlayisa muti, kuva lavanene, kuva lavatibekaka hansi ka vanuna vavu, akuva zritu dzra Xikwembu dzringachuki dzrisoliwa.
6 Na vone vampsha vatsratsriye akuva vayenca minchumu ya kutwisiseka,
7 hi nkama wuli wun’we, na ubeka xikombiso xa mintizro leyinene aminchun’wini hinkwayu, udondzrisa kudumbeka, xinthunzi,
8 ni mavulavulela lamanene lamangasolekiki, lesvaku lweyi akanetaka adana, angakumi nchumu wa kubiha ni wa wun’we wa kuwuhlaya ha hine.
9 Lavanga malandzra vafanela kutibeka hansi ka vinyi va vone aminchun’wini hinkwayu, valwela kuvanyonxisa, vangaphikisani navu,
10 vangavayiveli nchumu, kambe vakombisa kudumbeka hinkwaku, akuva atimhakeni hinkwatu vatakota kuxongisa dondzro ya Muhuluxi wezru, Xikwembu.
11 Hikusa wumbilu bza Xikwembu bzikombisiwile, lebzihuluxaka vhanu va mixaka hinkwayu.
12 Bzihidondzrisa kutsrhika kuyeyisa Xikwembu ni kunavela ka misava, kambe hihanya hi kuyenca minchumu ya kutwisiseka, hihanya hi ndlela ya kululama hitlhela hichava Xikwembu amisaveni leyi hinga ka yone,
13 na hiyimela dumbo ledzrinyonxisaka ni kuhumelela lokuphatimaka ka Xikwembu lexikulu ni ka Muhuluxi wezru, Yesu Kriste,
14 lweyi angahifela akuva ahintsrhunxa ka wubihi hinkwabzu, akuva atibasisela vhanu vake va kuhlawuleka, lavahisekelaka mintizro leyinene.
15 Vulavula hi minchumu leyi, utsratsriya utlhela ukhwavela na ungachavi nchumu. Kungave na mhunu lwakuvonelaka hansi.