BRN

1   Vadzrimuxe kutibeka hansi ka wuhosi ni vazrangeli va mfumu, valandzra nawu, vatsrhama na vatibekiselile akuva vayenca ntizro wun’wana ni wun’wana lowunene,

2   vangakhaneli kubiha hi mhunu, vangazrandzri kuhanya hi timholova, kambe vava va kunabzala, vava ni moya wa kuzrula amahlweni ka vhanu hinkwavu.

3   Hikusa na hine hisama hiva vhanu va kumphunta, va nkanu, va kulahleka, va kufumiwa hi kunavela lokubihiki ka tinxakanxaka ni kuzrandzra kutlanga, va kuyencelana nsele ni mona, va kunyenyentsa ni va kunyenyana.

4   Kambe, loko hikombekisiwe wumbilu bza Muhuluxi wezru, kunga Xikwembu, ni lizrandzru ledzri xinga nadzru hi vhanu,

5   xihihuluxile, na kungali hilesvi ahiyence mintizro ya kululama, kambe xihihuluxe hi mhaka ya timpsalu ta xone, hi kuhihlampsa, hipsaliwa ximpsha, hiva hipfuxetiwa hi moya wa kuxwenga,

6   lowu xiwuchululiki ahenhla kwezru hi mpimu lowukulu hi kutizrisa Yesu Kriste, Muhuluxi wezru,

7   kuyencela lesvaku, antsrhaku ka kuva hihlayiwe lavalulamiki hi wumbilu lebzo bza xone, hitakota kuva vamadapfindla hi kulandzra dumbo dzra wutomi lebzingahelikiki.

8   Mazritu lawa madumbeka; xilesvo nijula lesvaku utsrhama hi kukhanela hi timhaka leti, akuva lavapfumeliki ka Xikwembu vatsrhama hi kuyenca mintizro leyinene. Lesvi i svinene nakone svipfuna vhanu hinkwavu.

9   Kambe ungatinhingeniseli ka kuphikisana ka kukala ndlela ni kudondzra matimu ya mindangu, ni timholova ni kulwisana hi mhaka ya Nawu, hikusa lesvo i sva kukala ndlela nakone asvipfuni nchumu.

10   Loko mhunu ajula kuyavanisa bandla, nakuve umubasopisile kan’we kumbe kabidzri, mufulazrele,

11   na utiva lesvaku mhunu lweyo ahonekile funtsrhi awadoha, nakone atiyavanyisile ha wusvake.

12   Loko nikuzrumela Artema kumbe Tikiku, kahlula utatanikuma le Nikopolisi, hikusa hi lomu nivoniki kutsrhama kone hi wuxika.

13   Longelela ha hombe Zena, ntivi ya Nawu, na Apolu, akuva vangapfumali nchumu aliyendzrweni dzravu.

14   Kambe vhanu vezru kujuleka vatlhela vadondzra kutinyiketela amintizrweni leyinene, akuva vapfunisa loko svivileleka, akuva vangetiva vhanu va kukala vangapfuni nchumu.

15   Hinkwavu lavanga na mine vakudzrungula. Dzrungula lava vahizrandzraka alipfumelweni. Hinkwenu niminavelela wumbilu.