BRN

1   Pawlu, lweyi, hi kuzrandzra ka Xikwembu, anga mupostola wa Kriste Yesu, ka vhanu va Xikwembu lava kuxwenga lavanga le Efesa, ni lavadumbekaka xikan’we na Kriste Yesu:

2   Niminavelela wumbilu ni kuzrula lesvipfaka ka Xikwembu, Tatana wezru, ni le ka Hosi Yesu Kriste.

3   Akudzrumisiwe Xikwembu ni Tatana wa Hosi yezru Yesu Kriste, hikusa xihikatekisile hi nkateko wun’wana ni wun’wana wa moya amimbangwini ya le tilweni xikan’we na Kriste,

4   svanga hesvi xihihlawuliki akuva hiva xikan’we naye na misava yingesisunguliwa, akuva hiva lavaxwengiki ni lavangeke na nchumu wa kusoleka amahlweni ka xone hi lizrandzru.

5   Hikuva xihihlawule kehe khale akuva hiyenciwa vana va Xikwembu hi kola ka Yesu Kriste, xilesvi xisvinyonxelisaka xisvone hi kuya hi kuzrandzra ka xone,

6   akuva kudzrumisiwa wumbilu bza xone lebziphatimaka lebzi xihikombiki bzone hi kola ka muzrandzriwa wa xone.

7   Ha yene hikume kuntsrhunxiwa lokuhakeliwiki hi ngati yake, kunga kudzrivaleliwa ka svidoho svezru, hi kuya hi kutala wumbilu bza xone.

8   Xiyence lesvaku wumbilu lebzi bzihiyandzrela bzitlhela bzihalakela hi wutlhazri hinkwabzu ni kutwisisa hinkwaku,

9   hi kuhitivisa xihundla xa kuzrandzra ka xone, hi kuya hi lesvi xisvinyonxelisaka xisvone, lesvi xisvikunguhatiki mayelanu na yene,

10   lesvaku kuva ni wulaviseli bza muti loko kuhetisekile minkama leyibekisiwiki, akuva kuhlengeletiwa minchumu hinkwayu ka Kriste, anga leyinga amatilweni ni leyinga la misaveni; yene,

11   lweyi hitlheliki hinyikiwa xikan’we naye mfanelo ya kuva vamadapfinda, lesvi hihlawuliwiki na kehe khale hi kuya hi nkongometo wa lweyi ayencaka minchumu hinkwayu xilesvi asvivonisaka xisvone hi kuya hi kuzrandzra kwake,

12   akuva hidzrumisa wuphatimi bzake, hine lava hiviki va kusungula kubeka kulavisela kwezru ka Kriste.

13   Na n’wine mibeke kulavisela kwenu ka yene loko miyingele zritu dzra ntiyiso, anga madzrungula lamanene ya kuhuluxiwa kwenu; nakone loko mipfumelile, atizrisiwile akuva mifungiwa hi moya wa kuxwenga lowudumbisiwiki,

14   xinga xikombiso xa kuhitiyisa lesvaku hitadzrikuma pfindla dzrezru, akuva kuntsrhunxiwa vhanu va Xikwembu hi kuhakeleliwa, akuva kudzrumisiwa wuphatimi bza xone.

15   Hi mhaka leyi, na mine, loko niyingele ndzrava ya lipfumelo ledzri minga nadzru ka Hosi Yesu ni lizrandzru ledzri minga nadzru ka hinkwavu vhanu va Xikwembu lava kuxwenga,

16   anitsrhiki kukhensa ha n’wine; namiphata asvikhongotweni svanga,

17   na nikombela lesvaku Xikwembu xa Hosi yezru Yesu Kriste, Tatana lwaphatimaka, xingaminyika moya wa wutlhazri ni wa kupfuleteliwa wutivi bza xone,

18   ni kuva matihlo ya timbilu tenu mangavaningeliwa, akuva mitatwisisa lesvaku dumbo ledzri ximivitaneliki dzrone dzritsrhamisise kuyini, ni lesvaku wuphatimi bza pfindla dzra xone xikan’we ni vhanu va Xikwembu lava kuxwenga i bzikulu kuyatlhasa kwini,

19   ni lesvaku wukulu bza ntamu wake ka hine hipfumelaka abzihlayeki, hi kuya hi matizrela ya sviyenco sva xone lesva ntamu svinene,

20   lesvi xisvitizriki le ka Kriste, loko ximupfuxa akufeni ximutsrhamisisa axineneni xa xone amimbangwini ya le tilweni,

21   ahenhla ka mfumu wun’wana ni wun’wana, ni wuhosi bzin’wana ni bzin’wana, ni ntamu wun’wana ni wun’wana, ni wuzrangeli bzin’wana ni bzin’wana, ni vito dzrin’wana ni dzrin’wana ledzrivitaniwaka, kunge ntsena amisaveni leyi kambe ni le ka leyitaka.

22   Nakone xibeke hinkwasvu ahansi ka minkondzro yake, ximuyenca nhloko ya hinkwasvu abandleni,

23   ledzringa mizri wake, kutatiseka ka lweyi atataka hinkwasvu ka hinkwasvu.