-
Vagalatiya 5
1 Kriste ahintsrhunxile lesvaku hikuma ntsrhunxeko wolowo. Xilesvo, tiyani mikunde, nakone mingapfumeli kutlhela mitsrimbeleliwa kangi dzra wukazrawa.
2 Vonani! Mine, Pawlu, nomibzela lesvaku loko mopfumela kusoka, ka n’wine Kriste angehetipfuna nchumu.
3 Funtsrhi nifakaza ka mani na mani lwapfumelaka kusoka lesvaku asindzriseka kubekisa ni nawu hinkwawu.
4 N’wine midzringisaka kuhlayiwa lavalulamiki hi kulandzrelela nawu mihambanisiwe na Kriste; milahlekeliwe hi wumbilu bzake.
5 Kambe hine, hi kola ka moya, hitsrhama na hiyimela wululami lebzidumbisiwiki, lebzikotekaka hi lipfumelo.
6 Hikusa ka Kriste Yesu, kusoka kumbe kuka kusoka asvipfuni nchumu, kambe xa lisima i lipfumelo ledzritizraka hi kola ka lizrandzru.
7 Amitsrutsruma hi ndlela ya kone. I mani lwamisiveliki kutama miyingiseta lesvi ntiyiso wusvijulaka?
8 Nkucetelo lowu awuhumi ka Yene lweyi amivitaniki.
9 Svikukumukisu svitsrongonyana svikukumuxa tirigu hinkwadzru ledzripfuviwiki.
10 Namidumba amahlweni ka Hosi lesvaku mingetipimisa sva kuhambana ni lesvi. Kambe lweyi amidzolonganisaka tinhloko, nhambi ota hi kwini, atakuma xikhatiso xake.
11 Kambe, vamakwezru, loko anotama nizrezra lesvaku vhanu vafanela kusoka, xana anahatatama nixanisiwela yini kee? Loko asvili tanu, vhanu avatatsrhika kukhunguvanyeka hi kuyingela lesvaku huluku dzripfela kufeliweni amhandzreni.
12 Ingiki vhanu lavatsrhamaka hi kumidzolonganisa tinhloko vangayatisusa wununa!
13 N’wine, vamakwezru, mivitaneliwe ntsrhunxeko; ntsena mingatizrisi ntsrhunxeko lowu svanga mukhandlu wa kuyenca kuzrandzra ka nyama, kambe tizrelanani hi lizrandzru.
14 Hikuva nawu hinkwawu wuhetiseke ka zritu dzrin’we, ledzriliki: “Zrandzra mhunukuloni kufana ni lesvi utizrandzrisaka xisvone.”
15 Kambe, loko n’wine mitsrhama hi kulumana ni kudetetelana, tivonelani lesvaku mingahetananani.
16 Kambe nili: Fambani hi moya; lanu mingetiyenca kunavela ka nyama ni kutsrongo.
17 Hikuva lesvi nyama yinavelaka svone svilwa ni moya; na wone moya wulwa ni nyama. Lesvibidzri svalwisana; xilesvo, lesvi mijulaka kusviyenca amisviyenci.
18 Kasi loko mifambisiwa hi moya, amile hansi ka nawu.
19 Kutani mintizro ya nyama yivoneka ha hombe, yinga leyi: Wugangu, mahanyela lamangabasangakiki, mahanyela ya tingana,
20 kugandzrela svithombe, kutizra hi timitsru ni mimoya, kuvengana, timholova, wukwele, mahlundzru, kulwisana, kuyavana, kupfula mintlawa leyitsravukaniki,
21 matsrhoho, wumpopsi, minkhuvu ya mabzala ni pongwe, ni minchumu ya kufana ni leyi. Mayelanu ni lesvi, namibasopisa, hi la nimibasopisiki ha kone, lesvaku lavayencaka minchumu leyo vangetida pfindla dzra Mfumu wa Xikwembu.
22 Kambe handzru wa moya i lizrandzru, kunyonxa, kuzrula, kulehisa mbilu, wumbilu, wunene, lipfumelo,
23 kunabzala ni kutikhoma. Aku na nawu wa kulwisana ni lesvo.
24 Nakone lava valumbaka Kriste Yesu vagongondzrele nyama yavu amhandzreni, ni kupsha ni kunavela ka yone.
25 Loko hihanya hi moya, ahifambeni hi kulandzra moya.
26 Hingatibzeleni lesvaku hitlula van’wana, hitsrhama hi kuphikisana ni kuxondzrolotana.