-
Vaheberu 1
1 Khale svinene, Xikwembu xivulavule ni vatatana vezru hi vaprofeta hi minkama ya kutala ni hi tindlela ta kutala.
2 Svosvi, amasikwini lawa ya wugamu, xivulavule na hine hi N’wana wa xone, lweyi ximubekiki lesvaku ava madapfindla wa minchumu hinkwayu, lweyi funtsrhi xiyenciki misava ha yene,
3 lweyi anga kuvaninga ka kuphatima ka Xikwembu ni xifaniso xa ntshima xa tsrhamela dzra xone, lweyi atamelaka minchumu hinkwayu hi zritu dzra ntamu wake, lweyi loko ahete kuhamba basisiwo dzra svidoho svezru, atsrhamiki axineneni xa Nkulukumba lwanga henhla.
4 Andzruluke lwatlulaka tintsrumi ngopfu svinene, hikusa anyikiwe vito ledzritlulaka ngopfu dzra tone.
5 Hikusa, hi yini ya tintsrumi leyi Xikwembu xingasama xiku ka yone: “U n’wananga; kusukela ka namunhla mine ni tatana waku”, xitlhela xiku: “Nitava tatana, kutani yene atava n’wananga”?
6 Kambe loko xitlhela xibuyisa Mativula ya xone amisaveni, xili: “Tintsrumi hinkwatu ta Xikwembu atimukhinsamele!”
7 Xitlhela xihlaya lesvi mayelanu ni tintsrumi: “Ayenca tintsrumi take mimoya, ni malandzra yake malangavi ya ndzrilo.”
8 Kambe mayelanu ni N’wana, xili: “Xikwembu i xitsrhamu xaku xa wuhosi hi masiku ni masiku, ni nhonga ya Mfumu waku i nhonga ya wululami.
9 Uzrandzre wululami, uvenga wubihi. Hi mhaka leyo, Xikwembu, Xikwembu xaku, xikutotile hi mafuzra ya kunyonxa lokukulu, kutlula vanakuloni.”
10 Xiva xiku: “Akusunguleni, we Hosi, ubeke masungulu ya misava; ni matilo i mintizro ya mavoko yaku.
11 Wone matahoneka, kambe wene utatsrhama na uli kone; mataguga kufana ni xiyambalu,
12 nakone utamasonga kufana ni xigumatana, nakone svanga hi xiyambalu matandzruluka svin’wana. Kambe wene u yelweyi wa mun’we, nakone malembe yaku mangaka mangavi na wugamu.”
13 Kambe hi yini ya tintsrumi leti, leyi xisamiki xikhanela ha yone, xiku: “Tsrhamisa axineneni xanga niko nibeka valala vaku svanga wunalavutelo bza minkondzro yaku”?
14 Xana hinkwatu ka tone ahi mimoya leyitizrelaka vhanu, leyingazrumiwa akuva yitizrela lavatakada pfindla dzra huluku?