-
Vaheberu 11
1 Lipfumelo i kudumba minchumu leyilaviseliwaka hi kuhelela; hi lexitiyisaka lesvaku minchumu leyingavoniwikiki yi kone.
2 Hikusa ha dzrone, vhanu va khale vatiyencele ndhuma leyinene.
3 Hi lipfumelo, hasvitwisisa lesvaku tilo ni misava svihambiwe hi kuleleta ka Xikwembu, xilesvo minchumu leyivoniwaka yive kone na svisukela ka minchumu leyingavoniwikiki.
4 Hi lipfumelo, Abele ahumexele Xikwembu xitlhavelo xa lisima dzrikulu kutlula xa Kayini, nakone hi lipfumelo ledzro akume ndhuma leyinene ya lesvaku alulamile, hikusa Xikwembu xinyonxele magandzrelo yake. Nakone nhambilesvi afiki, ahavulavula hi lipfumelo dzrake.
5 Hi lipfumelo, Enoki azruzrisiwile akuva angavoni lifu, nakone aangehe na kukumiwa hikusa Xikwembu aximuzruzrisile; hikusa na angesizruzrisiwa akume ndhuma leyinene ya lesvaku anyonxise Xikwembu svinene.
6 Nakone, handle ka lipfumelo asvikoteki kunyonxisa Xikwembu, hikusa lweyi atsrhindzrekelaka ka xone afanela kupfumela lesvaku xi kone ni lesvaku i muhakeli wa lavaxijuletelaka hi mbilu hinkwayu.
7 Hi lipfumelo Nowa, antsrhaku ka kuyamukela xitiviso xa Xikwembu mayelanu ni minchumu leyingesikivoniwa, achave Xikwembu ava ayaka ngalawa akuva kuhuluka ndangu wake. Nakone hi lipfumelo ledzri akombe lesvaku misava ayifaneliwa hi kukhatisiwa, atlhela ava mudi wa pfindla wa wululami lebzipfelaka ka lipfumelo.
8 Hi lipfumelo, loko Abrahamu, avitaniwile, ayingisetile hi kuhuma aya ka mbangu lowu aatawukuma svanga pfindla. Ahume afamba, nhambilesvi aangakutivi lomu aaya kone.
9 Hi lipfumelo, ahanye svanga muluveli atikweni dzra xidumbiso, ingiki ova ka tiko dzra vambeni, ahanya amatendeni na Izaki na Jakobe, lava avali vamadapfindla va xidumbiso xo xa xin’we xikan’we na yene.
10 Hikusa aayimela doropa ledzringa ni masungulu lamatiyiki, ledzri mukhandhi ni muyaki wa dzrone anga Xikwembu.
11 Hi lipfumelo, na yene Sara ayamukele ntamu wa kupsala vana, nhambilesvi aakhalute ntanga, hikuva aavona lweyi ayenciki xidumbiso svanga mhunu lwadumbekaka.
12 Hi xivangelo lexi, kusukela ka mhunu mun’we lweyi kungahlayiwaka lesvaku aafile, kupsaliwe vana, va kutala kufana ni tinyeleti ta tilo, ni va ntsrandzravahlayi kufana ni misava leyinga lwandle.
13 Hinkwavu lava vafe na va ni lipfumelo, nhambilesvi vakalaka vangakuvonanga kuhetiseka ka svidumbiso; kambe vakuvonile hi kule nakone vanyonxe ngopfu ha svone, vava vabzela vhanu lesvaku i vayeni ni valuveli amisaveni.
14 Hikusa lavavulavulaka hi ndlela leyo vasvibeka alivaleni lesvaku vajuletela tiko dzra ka kwavu.
15 Nakone, loko kunene avedzrimukela mbangu lowu vahumiki ka wone, inha vakume mukhandlu wa kutlhelela ka wone.
16 Kambe svosvi vajula mbangu wa kuyampsa, wunga lowa le tilweni. Xilesvo, Xikwembu axidani hi kuvitaniwa Xikwembu xavu, hikusa xivalulamisele doropa.
17 Hi lipfumelo, loko Abrahamu adzringiwile, anyikele Izaki. Nhambilesvi ayamukeliki svidumbiso, mhunu lweyi aajula kuhamba gandzrelo hi n’wanake wa mun’we,
18 nakuve aabzeliwe lesvi: “Lesvitakavitaniwa lixaka dzraku svitava kone hi Izaki.”
19 Kambe aayanakanya lesvaku Xikwembu axitasvikota kumupfuxa nhambi kufeni, nakone amuyamukelile hi ndlela ya kufanekisela.
20 Hi lipfumelo, na yene Izaki akatekise Jakobe na Isawu mayelanu ni minchumu leyi ayahata.
21 Hi lipfumelo, Jakobe, loko ali kusuhi ni kufa, akatekise mun’wana ni mun’wana wa vana va Josefa, ava akhinsamela Xikwembu na atiye hi nhloko ya nhonga yake.
22 Hi lipfumelo, loko Josefa ali kusuhi ni kufa, akhanele hi kuhuma ka vana va Yisrayele, ava anyikela svileleto mayelanu ni mazrambu yake.
23 Hi lipfumelo, Moxe afihliwe hi vapsele vake hi tihweti tizrazru antsrhaku ka kupsaliwa kwake, hikusa vasvivonile lesvaku xin’wanana axixongile, nakone avachavanga xileleto xa hosi.
24 Hi lipfumelo, loko Moxe akulile, ayale kuvitaniwa n’wana wa meFaru,
25 ahlawula kuxanisiwa ni vhanu va Xikwembu amatsrhan’wini ya kutinyonxisa sva nkamanyana hi xidoho,
26 hikusa avone lesvaku kuzruketeliwa hi mhaka ya Kriste asvili wukosi bzikulu kutlula minchumu ya lisima leyihlengeletiwiki le Gibita, hikusa matihlo yake amalavisa hakelo ntsena.
27 Hi lipfumelo, ahume Gibita, kambe kunge hi kuchava mahlundzru ya hosi, hikusa aayime atiya svanga hi loko avona lweyi angavoniwikiki.
28 Hi lipfumelo, abekise Paxkwa ni kuxuviwa hi ngati, lesvaku mudlayi angamayenci nchumu mativula yavu.
29 Hi lipfumelo, vatsremakanye Lwandle dzra Kuzuka svanga hi loko kuli ntlhava, kambe loko vagibita vadzringise kuyenca lesvo, vamitiwe hi mati.
30 Hi lipfumelo, maphangu ya Jeriko mawile antsrhaku ka loko vhanu vazrendzrelekele 7 wa masiku.
31 Hi lipfumelo, Rahabe, lwewa nghwavana, angalovanga ni lavatiyalisiki, hikusa ayamukele tinhloli hi kuzrula.
32 Kutani nahatahlaya lesvaku yini? Hikusa nkama awutanisiya loko anoya mahlweni nidzrungula ta Gidiyoni, Baraki, Samsoni, Jefta, Davhida, na Samuweli ni vaprofeta vambeni.
33 Hi lipfumelo, volavo vahlule mimfumu, vayence ntizro wa wuyavanyisi, vakume lesvi vadumbisiwiki svone, vasive minomu ya tinghonyama,
34 vatime ntamu wa ndzrilo, vahuluke kudlayiwa hi lipanga, vahume ka xiyimu xa kutsrana vayenciwa lava ntamu, vave tinhenha ta yimpi, vahlongolise mabutsrhu ya valala.
35 Vavasati vayamukele vafi vavu hi kupfuxiwa kufeni, kambe vhanu vambeni vaxanisiwile hikusa avangapfumeli kuntsrhunxiwa hi tizrulo dzra kukazri, akuva vatakuma kupfuxiwa lokuyampsaka.
36 Nakone vambeni vakume ni ya kuhlekiwa ni kubeteteliwa hi minkhavi, vatlhela vatsrimbiwa, vapfaleliwa majele.
37 Vakhandliwe hi mazribze; vayavanyisiwile; vasahiwe hi makazri; vadlayiwe hi lipanga; vafambe vayingayinga na vayambale svikhumba sva tihamba ni sva timbuti, na vali svisiwana sva wugamu, na vadisiwa mbhinyeto hala na vaxanisiwa;
38 funtsrhi misava ayingavafaneli; na vatsrhama hi kutsrendzreleka le mananga ni le tinhaveni, ni timhakweni ta misava.
39 Nhambitanu, lavo hinkwavu, nhambilesvi vakumiki ndhuma leyinene hi kola ka lipfumelo dzravu, avakuvonanga kuhetiseka ka xidumbiso,
40 hikusa Xikwembu axihibekisele nchumu wa kuyampsa kutlula lesvo, akuva vangachuki vayenciwa lavahetisekiki na vange na hine.