-
Vaheberu 2
1 Hi xivangelo lexi, hifanela kuzreyela ngopfu ndleve minchumu leyi hiyiyingeliki kutlula sva masiku, akuva hingachuki hihuma ndleleni.
2 Hikusa loko zritu ledzrivulavuliwiki hi kutizrisa tintsrumi dzrihetisekile, kutlhela kukhatisiwa xihono xin’wana ni xin’wana ni wupfukeli bzin’wana ni bzin’wana hi ndlela ya kone,
3 xana hitahulukisa kuyini loko hitlange hi huluku ledzrikulu ledzranga hi ledzri kee? Hikusa dzrisungule kuvulavuliwa hi Hosi yezru, dzriva dzritiyisiwa ka hine hi lavasviyingeliki,
4 na Xikwembu xibeka wumboni hi kuvaseketela hi svikombiso, ni svihlamaliso, ni masingita ya kuhambanahambana ni hi kuvayavela moya wa kuxwenga hi kuya hi kuzrandzra ka xone.
5 Hikusa misava leyahataka, leyi hikhanelaka ha yone, axiyibekanga ahansi ka tintsrumi.
6 Kambe ka ndzrimana ya kukazri, mboni ya kukazri yite: “Xana mhunu i yini lesvaku utamudzrimuka, kumbe n’wana wa mhunu lesvaku ungamulondzrisa?
7 Umuyence ava ntsrongonyana ka tintsrumi; umubekele kuphatima ni xichavu anhlokweni yake, utlhela umunyika ntizro wa kulavisela mintizro ya mavoko yaku.
8 Minchumu hinkwayu yibekiwe ahansi ka minkondzro yake.” Hi kubeka minchumu hinkwayu ahansi kwake, Xikwembu axisiyanga nchumu na wunge hansi kwake. Kambe svosvi ahisivona minchumu hinkwayu na yibekiwe hansi kwake.
9 Kambe hamuvona Yesu, lweyi ayenciwiki ntsrongonyana ka tintsrumi, svosvi na abekeliwe kuphatima ni xichavu anhlokweni yake, hilesvi atiyiseleliki lifu, lesvaku hi wumbilu bza Xikwembu atatwa lesvaku lifu dzritsrhamisise kuyini, na afela hinkwavu.
10 Hikusa asvifanela lesvaku, ankama lowu atisiki vana vanyingi akuphatimeni, lweyi hinkwasvu lesvinga kone sviyenceliwiki yene, ni lweyi svinga kone ha yene, ayenca lesvaku Musunguli wa kuhuluka kwavu ava lwahetisekiki, hi kutizrisa tinxanisa.
11 Hikusa lweyi axwengisaka ni lavaxwengisiwaka hinkwavu vahuma ka mhunu mun’we. Xilesvo, anga na tingana ta kuvavitana vamakwavu,
12 loko aku: “Nitatwalisa vito dzraku ka vamakwezru; nitakudzrumisa hi tinsimu andzreni ka bandla.”
13 Atlhela aku: “Nitadumba yene.” Atlhela aku: “Hi mine lweyi ni vatsrongwana lava Xikwembu xinganinyika vone.”
14 Xilesvo, lesvi “vatsrongwana” na vone vanyikiwiki wuxaka ka ngati ni nyama, na yene, hi ndlela leyifanaka, anyikiwe minchumu leyifanaka, akuva hi lifu dzrake ahelisa lweyi anga ni ntamu wa kuvanga lifu, anga Diyavulosi,
15 ni lesvaku antsrhunxa hinkwavu lava avatsrhama na vali svikazrawa awuton’wini bzavu hinkwabzu hi mhaka ya kuchava lifu.
16 Hikusa kunene ahi tintsrumi atipfunisaka, kambe apfunisa vana ni vatukulu va Abrahamu.
17 Xilesvo, svijule kuva afana ni “vamakwavu” hi matlhelo hinkwawu, lesvaku atakota kuva muprista lwenkulu lwanga ni timpsalu ni lwadumbekaka amahlweni ka Xikwembu, akuva anyikela gandzrelo dzra kukombelela vhanu lidzrivalelo dzra svidoho svavu.
18 Lesvi yene hi ntshima axanisekiki ni lesvi adzringiwiki, awasvikota kutsrutsrumela lavadzringiwaka akuva avapfuna.