-
Vaheberu 3
1 Xilesvo, vamakwezru lava kuxwenga, n’wine mihlengelaka akuvitaniweni ka le tilweni, lavisisani mupostola ni muprista lwenkulu lweyi hipfumelaka ka yene, anga Yesu,
2 lwadumbekaka ka lweyi amubekiki, svanga hesvi Moxe na yene adumbekiki andlwini yake hinkwayu.
3 Hikusa ahlayiwa lwafaneliwaka hi wuphatimi bza kutlula bza Moxe, hikuva lweyi ayakaka yindlu afaneliwa hi xichavu kutlula yindlu ya kone.
4 Hikusa yindlu yin’wana ni yin’wana yiyakiwa hi mhunu, kambe lweyi ayakiki minchumu hinkwayu i Xikwembu.
5 Kutani Moxe kunene aadumbeka svanga nandzra andlwini ya xone hinkwayu svanga wumboni bza minchumu leyi akutakhaneliwa ha yone antsrhaku,
6 kambe Kriste aadumbeka svanga n’wana lwalaviselaka yindlu ya Xikwembu. Hine hi yindlu yake loko, kunene, hikhoma svitiya akuvulavuleni kwezru na hingatilumalumi ni le ka dumbo ledzri hitikhuzaka ha dzrone kuyatlhasa awugan’wini.
7 Xilesvo, svanga hesvi moya wa kuxwenga wuhlayaka ha kone, wuku: “Namunhla, loko miyingiseta zritu dzrake,
8 minganonon’hwisi timbilu tenu kufana ni nkama lowu vanganipfuka ha wone, svanga hi le sikwini dzra ndzringo amananga,
9 lomu vatatana venu vanganidzringa kone vatlhela vanikambeta, nhambiloko vavone mintizro yanga hi 40 wa malembe.
10 Xilesvo, nihlundzrukele lixaka ledzri, niku: ‘Minkama hinkwayu vapepetseka atimbilwini tavu, nakone avatitivanga tindlela tanga.’
11 Kutani akuhlundzrukeni kwanga nifungile, niku: ‘Vangetinhingena akuwiseni kwanga.’”
12 Tivonelani, vamakwezru, lesvaku kungachuki kumila mbilu ya kubiha andzreni ka mhunu wa kukazri amakazri kwenu, ya kukala lipfumelo hi kusuka ka Xikwembu lexihanyaka;
13 kambe tiyisanani siku dzrin’wana ni dzrin’wana, loko kahahlayiwa lesvaku “Namunhla”, akuva kungavi na mhunu amakazri kwenu lwatlanyatiwaka nhloko hi kukanganyisana ka xidoho.
14 Hikusa hi vanghanu va Kriste ntsena loko kunene hikhoma svitiya ka dumbo ledzra le kusunguleni kuyatlhasa awugan’wini.
15 Svanga hesvi kuhlayiwaka lesvi: “Namunhla, loko miyingiseta zritu dzrake, minganonon’hwisi timbilu tenu kufana ni nkama lowu vanganipfuka ha wone.”
16 Hikusa i vamani lavasviyingeliki vagama vamupfuka? Xana ahi vone hinkwavu lavangahumexiwa Gibita hi Moxe?
17 Nakone, funtsrhi, i vamani lava Xikwembu xivahlundzrukeliki hi 40 wa malembe? Ahi vone lavangadoha, lava mintsrumbu yavu yiwiki le mananga?
18 Nakone i vamani lava xingafunga lesvaku vangaka vanganhingeni akuwiseni ka xone? Xana ahi vone lavayaliki kuyenca lesvi avabzeliwa svone kee? 19 Xisvosvo, hasvivona lesvaku avasvikotanga kunhingena hi mhaka ya kupfumala lipfumelo.