-
Vaheberu 6
1 Xilesvo, lesvi hihetiki minchumu ya masungulu ya dondzro ya Kriste, ahiyeneni mahlweni hilwela kuwupfa; hingahatlheli hibeka masungulu: ka sva kutisola amintizrweni leyifiki ni sva kukomba Xikwembu lipfumelo,
2 dondzro ya babatiso, sva kutlhanteka ka mavoko, sva kupfuxiwa ka vafi ni sva yavanyiso ledzringahelikiki.
3 Kutani lesvo hitasviyenca loko Xikwembu xihipfumelela.
4 Hikusa asvikoteki ka lavasamiki vavaningeliwa, lavangadzringa nyiko ya le tilweni, lavanganyikiwa ni moya wa kuxwenga,
5 lavangatwa kunandzrika ka zritu dzra Xikwembu ni kuhlamalisa ka misava leyitaka,
6 kambe vagamiki vaduka, lesvaku vangatlhela vapfuxetiwa vatisola, hikusa vatlhela vagongondzrela N’wana wa Xikwembu amhandzreni, vamudanisa ka vhanu.
7 Hikusa loko misava yinwa mpfula leyitsrhamaka hi kuna ahenhla ka yone, yigama yipsala svimila lesvipfunaka lavayidzrimaka, yikuma nkateko wa Xikwembu.
8 Kambe loko yihumexa mitwa ni svitlhavana, yadzreliwa nakone yi kusuhi ni kuzruketeliwa, funtsrhi yitagama hi kuhisiwa.
9 Kambe ka n’wine, vazrandzriwa, hidumba lesvaku hitavona sva kuyampsa, lesviyelanaka ni huluku, nhambilesvi hikhanelaka hi ndlela leyi.
10 Hikusa Xikwembu ahi mubihi lakakuva xingadzrivala ntizro wenu ni lizrandzru dzrenu ledzri midzrikombisiki vito dzra xone hi kutizrela vhanu va xone lava kuxwenga, ni lesvi mahayaka mahlweni mivatizrela.
11 Kambe hinavela lesvaku mun’wana ni mun’wana wenu ava ni nkhinkhi leyifanaka akuva atava ni kudumba lokuheleliki ka kukuma lesvi alaviselaka svone kuyatlhasa wugamu,
12 lesvaku mingachuki miloloha, kambe miyetisela lava hi lipfumelo ni kulehisa mbilu vavonaka kuhetiseka ka lesvi vadumbisiwiki svone.
13 Hikusa loko Xikwembu xiyence xidumbiso xa xone ka Abrahamu, lesvi axinge na kufunga hi mun’wana lwanga nkulu kutlula xone, xifunge ha xone hi ntshima,
14 xiku: “Kunene nitakukatekisa niva nikuyandzrisa.”
15 Kutani loko Abrahamu alehise mbilu, avone kuhetiseka ka xidumbiso lexi.
16 Hikusa vhanu vafunga hi mhunu lweyi avatlulaka hi wukulu, nakone kufunga kwavu kuheta mapongwe, hikuva i xitiyiso xa le nawini ka vone.
17 Hi ndlela leyifanaka, loko Xikwembu xivone sviyampsa kukombisa hi kukhanya vamadapfindla va xidumbiso lesvaku nkongometo wa xone awucinci, xixitiyise hi kufunga,
18 kuyencela lesvaku, hi kola ka minchumu yibidzri leyingacincikiki, leyi ka yone svingakotekikiki kuva Xikwembu xihemba, hine, lava hitsrutsrumiki hitatatumbela ka xone, hingakuma kuchaveleliwa lokukulu svinene akuva hikhomelela svitiya ka dumbo ledzri hibekeliwiki dzrone.
19 Dumbo ledzri dzrifana ni nsimbi leyidumbekaka ni leyitiyiki ya kukhoma boti, ya kuhuluxa wutomi bzezru, nakone dzrinhingena ni lomu kupfaliwiki hi xisizrelo,
20 lomu muzrangeli wezru, Yesu, anhingeniki kone kupfuna hine, yene lweyi svosvi anga muprista lwenkulu hi la kungahelikiki, hi xiyimu xa Melkizedeki.