BRN

1   N’wine minga ni malandzra, khomani malandzra yenu hi ndlela ya kululama na mingavakhinyavezi, hi kutiva lesvaku na n’wine mi ni N’winyi wenu atilweni.

2   Phikelelani akuhambeni ka svikhongoto; mivonelela amhakeni leyi na mikhensa.

3   Hi nkama wuli wun’we, hihambelani svikhongoto na hine, akuva Xikwembu xihipfulela mukhandlu wa kuhlaya zritu, hitakota kutwalisa xihundla xa Kriste, lexi mine ninga jele hi mhaka ya xone,

4   ni kuva nikota kuxikhanyisela hinkwavu hi la svijulaka kuva nivulavula ha kone.

5   Hanyani hi wutlhazri ni lavanga handle, miwulondzrovota svinene nkama wenu.

6   Mazritu yenu minkama hinkwayu amave ya wumbilu, malungiwile hi munyu, akuva mitiva ndlela leyi mifanelaka kuhlamula ha yone mhunu ni mhunu.

7   Tikiku, makwezru lwazrandzrekaka ni mutizreli lwadumbekaka ni nandzrakulozri amahlweni ka Hosi, atamidzrungulela ndzrava yanga hinkwayu.

8   Nimizrumelela yene hi mhaka yoleyi, akuva mitativa ndzrava yezru ni kuva atachavelela timbilu tenu.

9   Abuya na Onezmu, makwezru lwadumbekaka ni lwazrandzrekaka, lweyi abuyiki hi halanu. Vatamidzrungulela hinkwasvu lesviyencekaka halenu.

10   Arixtarku, lweyi hinga jele xikan’we, awamidzrungula; naye Marku, makwa Barnaba, awamidzrungula (hi yelweyi mingaleletiwa mayelanu na yene lesvaku loko amitlhasela, muhoyozelani),

11   na Yesu, lwavitaniwaka Juxtu, lavanga va lixaka dzra lavasokiki. Hi vone ntsena vatizrelaka Mfumu wa Xikwembu xikan’we na mine, nakone vanichavelele svinene.

12   Epafra, nandzra wa Kriste Yesu, lweyi abuyiki hi halanu, awamidzrungula. Atsrhama na atikazrata hi kumikombelela hi svikhongoto, lesvaku, svanga vhanu lavawupfiki ni lavakholwisisaka ka Xikwembu hi kuhelela, mitama miyenca kuzrandzra ka xone.

13   Hikusa namufakazela lesvaku atikazrata ngopfu svinene hi n’wine ni hi lavanga le Lawodikiya ni le Hiyerapoli.

14   Luka, mudahi lwazrandzrekaka, awamidzrungula; naye Dema awamidzrungula.

15   Nidzrungulelani vamakwezru va le Lawodikiya, na Nimfa ni bandla ledzritlhanganaka akaya kwake.

16   Kutani loko papela ledzri dzridondzriwile amakazri kwenu, yencani lesvaku dzritlhela dzridondzriwa ni le bandleni dzra valawodikiya, ni kuva na n’wine midondzra ledzribuyaka hi le Lawodikiya.

17   Nakone, bzelani Ariyekipu, miku: “Lavisisa wutizreli lebzi unganyikiwa bzone hi Hosi, akuva ubzihetisisa.”

18   Madzrungula lawa, mine Pawlu, nimatsrale hi xiyandla xa ka kwanga. Dzrimukani lesvaku nile jele. Himinavelela wumbilu.