-
Varoma 1
1 Pawlu, nandzra wa Kriste Yesu, lwavitaneliwiki kuva mupostola, ahlawuleliwiki kuzrezra madzrungula lamanene ya Xikwembu,
2 lawa ximadumbisiki khale hi vaprofeta va xone Matsralweni laya ku kuxwenga,
3 mayelanu ni N’wana wa xone, lwahumiki alixakeni dzra Davhida hi kuya hi nyama,
4 kambe lweyi, hi kola ka ntamu, ahlayiwiki N’wana wa Xikwembu, hi kuya hi moya wa wuxwengi, hilesvi apfuxiwiki akufeni, anga Yesu Kriste, Hosi yezru,
5 lweyi ha yene hiyenceliwiki wumbilu hitlhela hinyikiwa wupostola, akuva hivitana vhanu va matiko akuva vayingiseta hi kukombisa lipfumelo, hi nkonta ya vito dzrake.
6 Na n’wine mivitaniwe amakazri ka matiko wolawo akuva milumba Yesu Kriste.
7 N’wine hinkwenu minga Roma, vazrandzriwa va Xikwembu, lava mivitaneliwiki kuva vhanu va xone va kuxwenga: Niminavelela wumbilu ni kuzrula lesvipfaka ka Xikwembu, Tatana wezru, ni le ka Hosi Yesu Kriste.
8 Kusungula, nikhensa Xikwembu xanga hi kola ka Yesu Kriste hi nkonta yenu hinkwenu, hikusa kukhaneliwa hi lipfumelo dzrenu amisaveni hinkwayu.
9 Hikuva Xikwembu, lexi nixitizrelaka hi moya wanga akutwaliseni ka madzrungula lamanene ya N’wana wa xone, i mboni yanga ya ndlela leyi minkama hinkwayu nimiphataka ha yone na ningakazrali asvikhongotweni svanga,
10 na nikombela lesvaku, loko Xikwembu xisvizrandzra, kumbexana ningagamela kusvikotisa kumibuyela.
11 Hikuva ninavela kumivona, akuva niminyika nyiko ya kukazri ya moya akuva mitiyisiwa,
12 anga lesvaku mikuma nkama wa kutiyisana, mun’wana ni mun’wana hi lipfumelo dzra munghanu, dzra ka kwenu ni dzra ka kwanga.
13 Kambe anijuli mitsrhama na mingasvitivi, vamakwezru, lesvaku i kanyingi na nijula kumibuyela, kambe nisiveliwile kutatlhasa svosvi, akuva nitatsrhovela mihandzru ya kukazri amakazri kwenu svanga hesvi sviyencekaka amakazri ka van’wana va matiko.
14 Ni ni xikweneti ka vagrika ni va kupfa matikweni, ka tintlhazri ni svimphunta;
15 Hi svosvo, ke, sviniyenciki nitsrhama na nitibekisele kutwalisa madzrungula lamanene ni le ka n’wine le Roma.
16 Hikuva anidani hi madzrungula lamanene; nakunene i ntamu wa Xikwembu wa kuhuluxa mani na mani lwapfumelaka: mujuda, kusungula, kuyela mugrika.
17 Hikuva wululami bza Xikwembu bzibekiwa alivaleni hi kutizrisa wone, na svisukela ka mun’we anga ni lipfumelo sviya ka mun’wana anga ni lipfumelo, svanga hesvi kutsraliwiki lesvi: “Kambe lwalulamiki atahanya hi lipfumelo.”
18 Hikuva mahlundzru ya Xikwembu mabekiwa alivaleni kusukela atilweni, mawela vhanu hinkwavu lavayeyisaka Xikwembu ni lavayencaka lesva kubiha, lavakandzretelaka ntiyiso hi wubihi bzavu,
19 hikusa minchumu leyingativiwaka mayelanu ni Xikwembu yivoneka hi kukhanya amakazri kwavu, hikuva Xikwembu xivakhanyisele yone.
20 Hikuva matsrhamela ya xone lamangavonekiki matikomba hi kukhanya kusukela akutumbuluxiweni ka misava, hi kola ka minchumu leyihambiwiki, leyitwisisekaka, kunga ntamu wa xone lowungahelikiki ni wukwembu bza xone; xilesvo ava na xa kutiyimelela ha xone.
21 Hikuva nhambilesvi avaxitiva Xikwembu, avaxidzrumisanga svanga Xikwembu, nhambi kuxikhensa avaxikhensanga, kambe vandzruluke va phanga amiyanakanywini yavu nakone timbilu tavu leta kumphunta tindzruluke munyama.
22 Vali vatlhazrihile, kambe vandzruluke svimphunta,
23 nakone vandzrulute kuphatima ka Xikwembu lexingeke na kufa kuva nchumu wa kufana ni xifaniso xa mhunu lwafaka, ni tinyanyana ni svihazri sva mune wa minenge ni svikokovi.
24 Xilesvo, hi kulandzra kunavela ka timbilu tavu, Xikwembu xivanyikete ka mahanyela lamangabasangakiki, lesvaku mizri wavu wudaniseka amakazri kwavu,
25 lesvi vacincisiki ntiyiso wa Xikwembu hi madzrimi, vachava vatlhela vagandzrela nchumu lowu weketumbuluxiwa amatsrhan’wini ya Mutumbuluxi wa wone, lwakhensiwaka hi masiku ni masiku. Amen.
26 Hi mhaka ya lesvo, Xikwembu xivatsrhikete vapsha hi kunavela lokudanisaka ka kunyonxisa svizro sva mbeleko, hikuva vavasati vavu vatsrhikete lesvi vatumbuluxeliwiki svone vayenca lesvingeke sva ntumbuluku;
27 Hi ndlela leyifanaka, na vone vavanuna vatsrhikete wuxaka bza ntumbuluku ni vavasati vapsha hi kunavelana amakazri kwavu, va xinuna ni va xinunakulobze, vayenca sva tingana, vava vatikumela kukhatisiwa lokufanelaka xihoxo xavu.
28 Nasvone, lesvi hi kuvona kwavu, svikalaka svingafaneli kuva ni wutivi bza Xikwembu, Xikwembu xivanyikete amiyanakanywini leyingapfunikiki nchumu, akuva vayenca minchumu leyingafanelikiki,
29 hikusa vatale hi wubihi hinkwabzu ni kuhoneka, makwanga, mona; i vhanu va kutala hi matsrhoho, wudlayi, kuhanya hi gundurugunduru, wukanganyisi, nsele; i vahlevi,
30 ni valumbeti; i vhanu lavavengaka Xikwembu, va tihanyi, lavatikukumuxaka, lavatidzrumisaka, vakhandhi va minchumu ya kubiha, lavangayingisetikiki vapsele,
31 lava tingatekikiki, lavangadumbekiki, lavangeke na lizrandzru ni lavangeke na ntsretsrelelo.
32 Vhanu lava vaxitiva xileleto xa kululama xa Xikwembu, lexiliki lavayencaka minchumu leyo vafaneliwa hi lifu; kambe vayiyencetela vatlhela vanyonxa hi lava vayiyencetelaka.