BRN

1   Vamakwezru, lesvi mbilu yanga yisvinavelaka ni lesvi nivakombelelaka ka Xikwembu i kuva kunene vahuluxiwa.

2   Hikuva navafakazela lesvaku vahisekela Xikwembu, kambe ahi kuva votiva nchumu.

3   Hikuva, lesvi avangabzitivi wululami bza Xikwembu, ni lesvi vajuliki kutibekela bza ka kwavu, avatibekanga hansi ka wululami bza Xikwembu.

4   Hikuva Kriste i wugamu bza Nawu, lesvaku mani na mani lwapfumelaka ava ni wululami.

5   Hikuva Moxe atsrala lesvi hi wululami bza kufambelana ni Nawu: “Mhunu lweyi ayencaka minchumu leyi atahanya hi yone.”

6   Kambe wululami lebzipfelaka ka lipfumelo bzili: “Ungahlayi ambilwini yaku, uku: ‘I mani atakatlhantukela atilweni?’, hi lesvaku, akuva axixa Kriste,

7   kumbe: ‘I mani lweyi atakaxikela axikheleni xa xidziva?’, hi lesvaku, akuva ayatlhantukisa Kriste amakazri ka vafi.”

8   Kambe kutsraliwe yini? “Zritu dzrile kusuhi na wene, anon’wini waku ni le mbilwini yaku”; anga “zritu” dzra lipfumelo, ledzri hidzrizrezraka.

9   Hikuva loko uhlaya avhanwini hi nomu waku lesvaku Yesu i Hosi, utlhela upfumela ambilwini yaku lesvaku Xikwembu ximupfuxile akufeni, utahuluxiwa.

10   Hikuva mhunu apfumela hi mbilu akuva akuma wululami, kambe ahlaya hi nomu avhanwini akuva akuma kuhuluxiwa.

11   Hikuva ndzrimana yili: “Anga kone lweyi apfumelaka ka yene atakakhomisiwa tingana.”

12   Hikuva aku na kuhambana makazri ka mujuda ni mugrika. Ku ni Hosi yoleyi ya yin’we ahenhla ka hinkwavu, leyingatala hi wukosi kunyika hinkwavu lavayivitanaka.

13   Hikuva “mani na mani lwavitanaka vito dzra Jehovha atahuluxiwa.”

14   Nhambitanu, vatamuvitanisa kuyini lweyi vakalaka vangapfumelanga ka yene? Kutani, vatapfumelisa kuyini ka lweyi vakalaka vangayingelanga nchumu ha yene? Kutani, vatayingelisa kuyini na kunge na lweyi azrezraka?

15   Kutani, vatazrezrisa kuyini loko vangazrumiwanga? Svanga hesvi kutsraliwiki lesvi: “Ahi kuxonga ka yone minkondzro ya lavatwalisaka madzrungula lamanene ya lesvinene!”

16   Nhambitanu, ahi hinkwavu valandzriki lesvi madzrungula lamanene majulaka svone. Hikuva Ezaya ali: “Jehovha, i mani lwapfumeliki mhaka leyi hiyidzrunguliki?”

17   Kutani lipfumelo dzrilandzra lesvi dzrisviyingeliki. Kutani lesvi sviyingeliwaka sviyenceka na svipfela ka zritu dzra Kriste.

18   Kambe navutisa: Svili avayingelanga nchumu? Phela, “zritu dzravu dzrihume dzriya amisaveni hinkwayu, ni lesvi vasvihlayaka sviyetlhasa ni le mimbangwini ya le kule ya misava.”

19   Kambe navutisa: Svili Yisrayele aangativi nchumu? Kusungula, Moxe ali: “Nitakuvangela wukwele hi vhanu lavangeke tiko; nitakuhlundzrukisa hi tiko dzra kumphunta.”

20   Kambe Ezaya akuma nhlana wa kuhlaya lesvi: “Nikumiwe hi lava avanganijuleteli; nitivonekise ka lava avangafambi vavutisela hi mine.”

21   Kambe ahlaya lesvi hi Yisrayele: “Siku hinkwadzru nitikazrate hi kujula kupfuna vhanu va kukala vangayingiseti ni va nkanu.”