-
Varoma 12
1 Xilesvo, vamakwezru, namitsratsriya hi lizrezre ledzrikulu dzra Xikwembu, lesvaku minyikela mizri yenu svanga xitlhavelo lexihanyaka, lexixwengiki, ni lexinyonxisaka Xikwembu, kunga kutizrela Xikwembu hi miyanakanyu yenu leyipimisaka ha hombe.
2 Nakone mingatekeleli matsrhamela ya misava leyi, kambe ndzrulutiwani hi kutekelela mapimisela mampsha, akuva mitakota kusvivona ha wusvenu lesvaku kuzrandzra ka Xikwembu i kunene, kanyonxisa nasvone kuxongile hi matlhelo hinkwawu.
3 Hikuva hi wumbilu lebzi niyenceliwiki bzone, nibzela mani na mani lwanga makazri kwenu lesvaku angatibzeli lesvaku a ni lisima ngopfu kutlula lesvi afanelaka kusvipimisa, kambe aapimise hi ndlela ya kuva ni miyanakanyu leyitwisisekaka, mun’wana ni mun’wana hi kuya hi lesvi Xikwembu ximunyikiki mpimu wa kukazri wa lipfumelo.
4 Hikuva svanga hesvi amizrini wun’we hinga ni svizro svinyingi, na svizro hinkwasvu svingayenci ntizro wun’we,
5 kutani na hine, nhambilesvi hinga vanyingi, hi mizri wun’we ka Kriste, kambe ha mun’wemun’we hi svizro sva mun’wana ni mun’wana.
6 Kutani, hi ni tinyiko letihambanaka hi kuya hi wumbilu lebzi hikombiwiki bzone: angava kuprofeta, ahiprofeteni hi kulongoloka ni mpimu wa lipfumelo dzrezru;
7 kumbe angava wutizreli, ahitihiteni awutizrelini; kumbe mhunu anyikiwe kudondzrisa, aatihite kudondzriseni;
8 kumbe mhunu anyikiwe kuchavelela, aatihite kuchaveleleni; lweyi anga ni nyiko ya kuhanana, aahanane hi mbilu ya kubasa; lweyi anyikiwiki kuzrangela, aazrangele hi nkhinkhi; lweyi anga ni nyiko ya kutsrutsrumela van’wana ayavapfuna, aasviyence na anyonxile.
9 Lizrandzru dzrenu adzrive ledzringeke na wukanganyisi. Vengani lesva kubiha; minamazrela lesvinene.
10 Zrandzrananani hi lizrandzru dzra wukwavu. Changwelanani ka kukombana xichavu.
11 Tizrani hi nkhinkhi, mingalolohi. Hisekani aminchun’wini ya moya. Tizrelani Jehovha ntsena.
12 Nyonxani hi dumbo, mitiyisela loko mili hansi ka ndzringo. Tsrhamani hi kukhongota.
13 Yavelanani ni vhanu va Xikwembu lava kuxwenga hi kuya hi lesvi vasvivilelaka. Tihenani kuyamukela vayeni.
14 Hlayelani tinjombo lavamixanisaka; vanavelelani tinjombo, mingavazruki.
15 Nyonxani ni lavanyonxaka; dzrilani ni lavadzrilaka.
16 Vonani van’wana kufana ni lesvi mitivonisaka xisvone; mingatijuleli kuva henhla, kambe hanyani hi kutitsrongahata. Mingativoni na mitlhazrihile.
17 Mingatlheliseli mhunu wubihi hi wubihi. Julelani lesvinene vhanu hinkwavu.
18 Loko svikoteka ka n’wine, hanyisanani hi kuzrula ni vhanu hinkwavu.
19 Mingatidzrihiseli, vazrandzriwa, kambe tsrhikani mahlundzru makhaluta; hikuva kutsraliwe lesvi: “‘Lwafanelaka kudzrihisa hi mine; Hi mine nitakatlhelisela’, kuhlaya Jehovha.”
20 Kambe “loko nala waku a ni ndlala, mudise; loko a ni tozra, munyike svakunwa; hikuva hi kuyenca lesvo utava na utlhantekela makhala ya kuhisa anhlokweni yake.”
21 Ungapfumeli kuhluliwa hi lesva kubiha, kambe hlula lesva kubiha hi lesvinene.