BRN

1   Mhunu mun’wana ni mun’wana aatibeke ahansi ka wuhosi lebzinga henhla, hikuva aku na wuhosi lebzingeke hansi ka Xikwembu; kambe wuhosi lebzinga kone bzi kone hilesvi bzibekiwiki hi Xikwembu mimbangwini ya bzone.

2   Xilesvo, mani na mani lweyi alwaka ni wuhosi alwa ni lulamiselo dzra Xikwembu; kutani lavalwaka na dzrone vatikokela yavanyiso.

3   Hikuva vafumi avachavisi loko mhunu ayenca lesvinene, kambe vachavisa loko ayenca sva kubiha. Ujula kuhanya na ungachavi lwatamelisiwiki wuhosi? Yenca lesvinene, kutani atakudzrumisa;

4   hikuva i mutizreli wa Xikwembu akuva akuyencela lesvinene. Kambe loko uyenca lesva kubiha, chava, hikuva angatamelanga lipanga mahala. I mutizreli wa Xikwembu; i mudzrihiseli akuva akhatisa lwayencaka lesva kubiha.

5   Xilesvo, svasindzrisa lesvaku mitibeka ahansi, kunge ntsena hi mhaka ya kuchava xikhatiso kambe ni hi mhaka ya lipfalu dzrenu.

6   Hikusa, hi svosvo sviyencaka lesvaku mihakela ni tinemba; hikuva i vatizreli va Xikwembu lavatizrelaka mhaka leyi nkama hinkwawu.

7   Nyikani hinkwavu lesvivafanelaka: tinemba ka lwafaneliwaka hi tinemba; mali ya nhlengo ka lwafaneliwaka hi mali ya nhlengo; xichavu ka lwafaneliwaka hi xichavu; kubekeliwa lisima ka lwafaneliwaka hi kubekeliwa lisima.

8   Mingavi na xikweneti ka mhunu loko angali xa kuzrandzranana ntsena; hikuva lweyi azrandzraka mhunukulobze ahetisise nawu.

9   Hikuva nawu lowuliki: “Ungachuki uyenca wumbuye, ungachuki udlaya mhunu, ungachuki uyiva, ungachuki unavela sva vambeni”, ni xileleto xin’wana ni xin’wana lexinga kone, svisongiwa hi zritu ledzriliki: “Zrandzra mhunukuloni xilesvi utizrandzrisaka xisvone.”

10   Lizrandzru adzriyenceli mun’wana lesva kubiha; xilesvo, lizrandzru i kuhetisisa ka nawu.

11   Nakone yencani lesvo, svanga hesvi mitivaka nkama wa kone, lesvaku kutani yichayile akuva mipfuka wuzrongweni; hikuva svosvi kuhuluxiwa kwezru kuye kutsrhindzrekela kutlula nkama lowu hipfumeliki ha wone.

12   Wusiku bzi kusuhi ni kuhela; dambu dzrijula kuxa kutani. Xilesvo ahicukumeteni mintizro ya munyama hiva hiyambala matlhazri ya livaningo.

13   Ahifambeni hi hanyela dzra kuxonga svanga hi loko kuli nhlikanhi, kunge kuya minkhubzini ya pongwe ni le kupopseni, kunge kuhanyeni ka vhanu vabidzri na vangachatanga ni mahanyela lamangabasangakiki, kunge kuhanya hi timholova ni wukwele.

14   Kambe yambalani Hosi Yesu Kriste, nakone mingajuli maqhinga ya kuza mikota kunyonxisa kunavela ka nyama.