BRN

1   Yamukelani mhunu lwangeke na lipfumelo dzra kutiya, funtsrhi mingayavanyisi mhunu hi mhaka ya mavonela ya kuhambana.

2   Hikusa mun’we apfumela kuda hinkwasvu, kambe lweyi akalaka angatiyanga ada ntsena sva makamba.

3   Lweyi adaka angamuvonele hansi lweyi akalaka angadi, ni yelweyi akalaka angadi angasole lweyi adaka, hikuva Xikwembu ximuyamukelile.

4   Wova mani wene uyavanyisaka nandzra wa mun’wana? Lesvaku awayima kumbe awawa, svitiviwa hi n’winyi wake. Nakone atatiya, hikuva Jehovha angamuyimisa.

5   Kunene mun’we avona siku dzra kukazri na dzrili dzra lisima kutlula dzrin’wana; mun’wana avona siku dzra kukazri na dzrifana ni man’wana; mun’wana ni mun’wana aakholwiseke ka lesvi miyanakanyu yake yimubzelaka svone.

6   Lweyi abekisaka siku dzra kone adzribekisela Jehovha. Ni yelweyi adaka, ada hi mhaka ya Jehovha, hikuva akhensa Xikwembu; ni yelweyi akalaka angadi, angadi hi mhaka ya Jehovha, kambe akhensa Xikwembu.

7   Hikuva anga kone ka hine lweyi atihanyelaka, funtsrhi anga kone lweyi atifelaka.

8   Hikuva nhambiloko hihanya, hihanyela Jehovha, nhambiloko hifa, hifela Jehovha. Kutani nhambiloko hihanya kumbe nhambiloko hifa, hi va Jehovha.

9   Hikuva Kriste afele svosvo ava apfuxiwa, lesvaku atafuma lavafiki ni lavahanyaka.

10   Kambe wene umuyavanyisela yini makwenu? Kumbe nakone umudzrelela yini makwenu? Hikuva hinkwezru hitayima amahlweni ka xitsrhamu xa wuyavanyisi xa Xikwembu.

11   Hikuva kutsraliwe lesvi: “‘Nifunga ha mine’, kuhlaya Jehovha, ‘matsrolo hinkwawu matanikhinsamela, ni minomu hinkwayu yitadzrumisa Xikwembu.’”

12   Kutani ke, mun’wana ni mun’wana atatihlamulela amahlweni ka Xikwembu.

13   Xilesvo, ahahafanelanga kuyavanyisana kambe, ahitibekiseleni kukala hingabeki nchumu wa kuwisana kumbe xikhunguvanyiso amahlweni ka makwezru.

14   Nakone mine nitiva nitlhela nikholwiseka ka Hosi Yesu lesvaku aku na nchumu lowunyamiki hi wusvawone; ntsena loko mhunu awuvona na wungabasanga, ka yene awubasanga.

15   Hikuva loko makwenu avaviseka hi mhaka ya svakuda, awahafambi hi lizrandzru. Ungayenci lesvaku mhunu lweyo, lweyi Kriste angamufela, afa hi mhaka ya svakuda.

16   Xilesvo, ungatsrhiki minchumu leyinene leyi uyiyencaka yisoliwa svanga hi loko yebiha.

17   Hikuva mfumu wa Xikwembu ahi kuda ni kunwa, kambe i wululami ni kuzrula ahansi ka moya wa kuxwenga.

18   Hikuva mani na mani lwatizrelaka Kriste svanga xikazrawa atimhakeni leti awayamukeleka ka Xikwembu nakone awayamukeliwa hi vhanu.

19   Kutani ke, ahilandzreleleni minchumu leyitisaka kuzrula ni leyiyakanaka.

20   Mingahoneteli ntizro wa Xikwembu hi mhaka ya svakuda. Kunene, minchumu hinkwayu yibasile, kambe svibihile loko mhunu ayenca van’wana vawa hi mhaka ya kuda.

21   Svayampsa kukala ungadi nyama kumbe kunwa vhinyo, kumbe kuyenca yini na yini lexiwisaka makwenu.

22   Lipfumelo ledzri unga nadzru, tihlayisele dzrone amahlweni ka Xikwembu. Nyonxani ka yene mhunu lweyi akalaka angatikokeli kuyavanyisiwa hi minchumu leyi ayizrandzraka!

23   Kambe lweyi aganaganekaka, loko oda, ayavanyisiwile kutani, hikusa angadi na svisukela ka lipfumelo. Kunene, hinkwasvu lesvikalaka svingasukeli ka lipfumelo i xidoho.