-
Varoma 2
1 Xilesvo, wene mhunu, nhambi ungava mani, awu naxu xa kutiyimelela ha xone loko uyavanyisa; hikuva ankama lowu uyavanyisaka mun’wana, watiyavanyisa na wene, hikusa ye wene uyavanyisaka uyenca minchumu yo ya yin’we.
2 Kambe hine hasvitiva lesvaku mayavanyisela ya Xikwembu matwanana ni ntiyiso, ahenhla ka lavayencaka minchumu leyo.
3 Kutani ke, wene mhunu ndzriwene, uyavanyisaka lavayencaka minchumu leyo nakuve na wene wayiyenca, xana upimisa lesvaku utahuluka kuyavanyisiwa hi Xikwembu?
4 Kumbe udzrela kutala ka wunene bza xone ni kutiyisela ni kulehisa ka xone mbilu, hi kukala ungasvitivi lesvaku wunene bza Xikwembu bzitizrela kukuyenca utisola?
5 Kambe hi kola ka nkanu yaku ni mbilu yaku leyingatisolikiki, utihlengeletelela mahlundzru hi siku dzra mahlundzru ni dzra kukombisiwa ka wuyavanyisi bza Xikwembu lebzilulamiki,
6 lexitakanyika mun’wana ni mun’wana hi kuya hi mintizro yake:
7 anga wutomi lebzingahelikiki ka lavajuletelaka kuphatima, ni xinthunzi, ni kukala kufa hi kutiyisela antizrweni lowunene;
8 kasi lavapfuxaka kuyavana ni lavayalaka kuyingiseta ntiyiso, kambe vayingisetaka wubihi, vakuma mahlundzru ni wukazri;
9 kuxaniseka ni kukameka mbilu ahenhla ka mun’wana ni mun’wana lwayencaka lesva kubiha, ka mujuda kusungula, kuyela ni ka mugrika;
10 kambe kuphatima ni xinthunzi ni kuzrula ka mani na mani lwayencaka lesvinene, ka mujuda kusungula, kuyela ni ka mugrika.
11 Hikusa Xikwembu axi na xihlawuhlawu.
12 Hikuva hinkwavu lavadohiki na vange na nawu vatatlhela vafa na vange na nawu; kambe hinkwavu lavadohiki ahansi ka nawu vatayavanyisiwa hi nawu.
13 Hikuva lavalulamiki amahlweni ka Xikwembu ahi lavayingelaka nawu ntsena; kambe lavatakahlayiwa lesvaku valulamile hi lavayencaka lesvi nawu wusvihlayaka.
14 Hikuva loko vhanu va matiko, lavangeke na nawu, vayenca minchumu leyi nawu wuyihlayaka hi ntumbuluku, vhanu lava, nhambilesvi vangeke na nawu, vone i nawu ka vone hi ntshima.
15 Vakombisa lesvaku ntizro wa nawu wutsraliwe timbilwini tavu, nakone lipfalu dzravu dzravafakazela, funtsrhi miyanakanyu yavu yivabzela lesvaku vahoxile kumbe yivabzela lesvaku avahoxanga,
16 hi siku ledzri Xikwembu xitakayavanyisa minchumu leyifihlekiki ya vhanu hi kutizrisa Yesu Kriste, hi kuya hi madzrungula lamanene lawa nimatwalisaka.
17 Kutani ke, loko uli mujuda hi vito uva udumba nawu, utlhela utikhuza hi Xikwembu,
18 utlhela utiva kuzrandzra ka xone uva uyamukela minchumu leyinga ya lisima ledzrikulu leyi udondzrisiwaka na yisukela ka Nawu,
19 uva ukholwa lesvaku u mufambisi wa lavangavonikiki, ni livaningo dzra lavanga munyameni,
20 mulayi wa svimphunta, mudondzrisi wa vatsrongwana, utivisisaka Nawu hi wuyenti ni hi ntiyiso,
21 wene ke, lweyi udondzrisaka mun’wana, awutidondzrisi kee? Wene, lwazrezraka uku: “Ungayivi”, xana wayiva?
22 Wene, uliki “Ungachuki uyenca wumbuye”, xana wayenca wumbuye? Wene, lweyi unyenyaka svithombe, xana utlhanya matempele uyiva?
23 Wene lweyi utikhuzaka hi nawu, xana uzrukisa Xikwembu hi kutlula kwaku Nawu?
24 Hikuva “vito dzra Xikwembu dzrazrukiwa amakazri ka matiko hi mhaka yenu”, svanga hesvi kutsraliwiki ha kone.
25 Kusoka, kunene, kapfuna ntsena loko uyenca lesvi nawu wusvihlayaka; kambe loko uli mutluli wa nawu, kusoka kwaku kundzruluke kukala kusoka.
26 Xilesvo, loko lwakaka angasokanga alandzra svileleto sva kululama sva Nawu, xana angetihlayiwa lesvaku asokile nhambilesviakalakaangasokanga?
27 Kutani, hi kuhetisisa Nawu, lwewa kukala angasokanga hi ntumbuluku atakuyavanyisa, wene lweyi unga mutluli wa nawu nhambilesvi unga ni nawu lowutsraliwiki ni lesvi usokiki.
28 Hikuva mujuda ahi lweyi anga mujuda hi le handle, ni kusoka ahi nchumu wa le handle ni wa le nyameni.
29 Kambe mhunu i mujuda hi le ndzreni, ni kusoka hi loka le mbilwini, hi moya, kungali hi nawu lowutsraliwiki. Kudzrumisiwa ka mhunu lweyi akupfeli vhanwini kambe kupfela ka Xikwembu.