-
Varoma 7
1 Kumbe moka mingasvitivi, vamakwezru, (hikuva nikhanela ni lavativaka nawu) lesvaku Nawu wufuma mhunu loko ahahanya?
2 Hikuva wansati lwachatiki abohiwe hi nawu ka nuna wake loko ahahanya; kambe loko nuna wake afa, wansati lweyo antsrhunxekile ka nawu wa nuna wake.
3 Kutani ke, na nuna ahahanya, wansati lweyo aatavitaniwa muyenci wa wumbuye loko ova wa wanuna mun’wana. Kambe loko nuna wake afa, wansati lweyo antsrhunxekile anawini wa nuna wake; kutani ahi muyenci wa wumbuye loko ava wa wanuna mun’wana.
4 Xilesvo, vamakwezru, na n’wine midlayiwile hi tlhelo dzra Nawu hi kola ka mizri wa Kriste, lesvaku mitava va mhunu mun’wana, anga lweyi apfuxiwiki akufeni, akuva hitahumexela Xikwembu mihandzru.
5 Hikuva ankama lowu ahihanya hi kulandzra nyama, kunavela ka wudoho loku akupfuxiwa hi Nawu akutizra amizrini wezru akuva hihumexela lifu mihandzru.
6 Kambe svosvi hintsrhunxiwile ka Nawu, hikusa hifile hi tlhelo dzra lesvi ahibohiwile ka svone, lesvaku hikota kuva svikazrawa hi wumpsha bza moya, kungali hi wukhale bza nawu lowutsraliwiki.
7 Kutani ke, hitaku yini? Xana Nawu i xidoho? Svingeyenceki lesvo! Ntsena anha ningaxitivanga xidoho loko akungavanga hi kola ka Nawu. Hikuva anha ningasvitivanga lesvaku kunavela sva vhanu i yini loko Nawu awungahlayanga wuku: “Ungachuki unavela sva vhanu.”
8 Kambe xidoho, lesvi xikumiki mukhandlu lowu xinyikiwiki wone hi xileleto, xipsale mixaka hinkwayu ya kunavela sva vhanu andzreni kwanga, hikuva handle ka nawu, xidoho axifile.
9 Kambe nake nihanya na ninge na nawu. Kambe loko xileleto xitlhasile, xidoho xitlhele xipfuka funtsrhi, kutani mine nifa.
10 Kutani xileleto lexi axiyisa awuton’wini, kwanga xiyise akufeni.
11 Hikuva, lesvi xidoho xikumiki mukhandlu lowu xinyikiwiki wone hi xileleto, xiniwongile, xinidlaya hi xileleto.
12 Xilesvo, Nawu kunene wuxwengile, ni xileleto xixwengile, xilulamile nakone i xinene.
13 Kutani ke, xana lesvi svinga svinene kwanga svindzruluke lifu? Svingeyenceki lesvo! Kambe xidoho, akuva xitikomba lesvaku i xidoho, kwanga xipsala lifu hi lesvi svinga svinene, lesvaku, hi kola ka xileleto, xidoho xitava lexitlulisaka hi kudoha.
14 Hikuva hasvitiva lesvaku Nawu i wa moya, kambe mine ni wa nyama, lesvi nixavisiwiki ahansi ka xidoho.
15 Hikuva lesvi nisviyencaka anisvitwisisi. Hikuva aniyenci lesvi ninavelaka svone, kambe niyenca lesvi nisvivengaka.
16 Kambe, nhambi niyenca lesvi ningasvijulikiki, napfumela lesvaku Nawu i wunene.
17 Kutani, ankameni lowo, angehe mine nisviyencaka, kambe i xidoho lexitsrhamaka andzreni kwanga.
18 Hikuva nasvitiva lesvaku andzreni kwanga, kunga anyameni yanga, akutsrhami nchumu wa wunene; hikuva kunavela ka kuyenca lesvinene ku kone kwanga kambe wusvikoti bza kuyenca abzi kone.
19 Hikuva lesvinene lesvi nijulaka kusviyenca, anisviyenci, kambe lesva kubiha lesvi ningajulikiki kusviyenca, nasviyenca.
20 Kutani ke, loko niyenca lesvi ningasvijulikiki, angehe mine lwasviyencaka, kambe i xidoho lexitsrhamaka andzreni kwanga.
21 Xilesvo, nikuma nsinya lowu wa nawu, lesvaku loko ninavela kuyenca lesvinene, lesva kubiha svi kola kusuhi na mine.
22 Hikuva nawuzrandzra nawu wa Xikwembu hi kuya hi mhunu lweyi ninga yene hi le ndzreni,
23 kambe nivona amizrini wanga nawu wun’wana lowulwaka ni nawu wa miyanakanyu yanga, wuva wuniyenca xib’ochwa xa nawu wa xidoho lexinga mizrini wanga.
24 Nitsretsrisani, vakithi! Xana i mani lwatakanintsrhunxa amizrini lowufisaka xilesvi?
25 Svone no khanimambu ka Xikwembu hi kola ka Yesu Kriste Hosi yezru! Kutani ke, mine wa kone, hi miyanakanyu ni xikazrawa xa nawu wa Xikwembu, kambe hi nyama yanga ni xikazrawa xa nawu wa xidoho.