-
Vagalatiya 4
1 Kutani nili loko madapfindla ahali ntsrongwana, angahambani ni xikazrawa, nhambilesvi anga n’winyi wa hinkwasvu,
2 kambe ale hansi ka valaviseli ni vatameli va muti kuko kutlhasa nkama lowubekisiwiki hi tatana wake.
3 Hi ndlela leyifanaka, na hine, ankama lowu ahahali vatsrongwana, ahili wukazraweni bza minchumu ya masungulu ya misava.
4 Kambe loko kutlhase nkama lowubekisiwiki, Xikwembu xizrumele N’wana wa xone, lwangapsaliwa hi wansati lweyi aali hansi ka nawu,
5 akuva ahakelela ntsrhunxeko lava avali hansi ka nawu, lesvaku hikota kuyenciwa vana.
6 Kutani lesvi minga vana, Xikwembu xizrumele moya wa N’wana wa xone atimbilwini tezru, lowuhiyencaka hibandlukana, hiku: “Abba, we Tatana wanga!”
7 Xilesvo, wene awahali xikazrawa kambe u n’wana; nakone lesvi unga n’wana, svijula kuhlaya lesvaku na wene u madapfindla hi tlhelo dzra Xikwembu.
8 Kambe, ke, ankama lowu amingaxitivi Xikwembu, amili svikazrawa sva minchumu leyingeke svikwembu hi ntiyiso.
9 Kambe lesvi kutani mitivaka Xikwembu, kumbe lesvi kutani mitiviwaka hi Xikwembu, misvikotisa kuyini kutlhela milandzrelela minchumu leyingeke na ntamu ni minchumu ya masungulu leyingasizikiki nchumu, mitlhela mijula ku tiyenca svikazrawa sva yone?
10 Mikulungela masiku ya kukazri ni tihweti, tinguva ni malembe.
11 Nichava lesvaku kumbexana netikazrata mahala hi mhaka yenu.
12 Vamakwezru, nimikombela lesvaku mifana na mine, hikusa na mine khale anifana na n’wine. Aminihonelanga nchumu.
13 Kambe masvitiva lesvaku lexinganiyenca nimizrezrela madzrungula lamanene hi khambi dzra kusungula hilesvi anivabza anyameni.
14 Kambe, nhambilesvi kuvabza kwanga akuli xikazratu ka n’wine, aminidzrelanga funtsrhi aminyenyentsekanga ha mine; kambe minihoyozele kufana ni ntsrumi ya Xikwembu, kufana na Kriste Yesu.
15 Kutani ke, kuye kwini kunyonxa loku amili naku? Hikusa namifakazela lesvaku, loko asvekoteka, anha mitixokole matihlo mininyika.
16 Kutani ke, svosvi nindzruluke nala hilesvi nimibzelaka ntiyiso?
17 Vamihisekela ngopfu, kambe avamijuleli sva svinene; vojula kumihambanisa na hine, lesvaku mitahamba mivalandzrelela hi nkhinkhi.
18 Kambe i svinene loko mhunu amihisekela ngopfu na amijulela sva svinene minkama hinkwayu, nakone kunge ntsena loko nili na n’wine;
19 n’wine, vananga, lava nitlhelaka nilun’wa ha n’wine kuko Kriste avumbeka amakazri kwenu.
20 Aninavela lesvaku ningava na n’wine svosvi munene, niva nicinca mavulavulela yanga, hikusa nihlamala ningagami ha n’wine.
21 Nibzelani, n’wine mijulaka kuva hansi ka nawu: Xana amiwuyingeli nawu kee?
22 Hikuva, tsralwa dzrili Abrahamu aa ni vana vabidzri, mun’we wa kupsaliwa hi xitizri, mun’wana wa kupsaliwa hi wansati wa kuntsrhunxeka;
23 Kambe lweyi apsaliwiki hi xitizri kunene apsaliwe hi ndlela ya ntumbuluku kambe lwemun’wana wa kupsaliwa hi wansati wa kuntsrhunxeka apsaliwe hi kulandzra xidumbiso.
24 Minchumu leyi yingavoniwa svanga xifaniso; hikusa vavasati lava vafanekisela svipfumelelanu svibidzri: lexa Nhava ya Sinayi, lexipsalaka vana va wukazrawa, lexi kunga Hagari.
25 Kutani Hagari afanekisela Sinayi, kunga nhava leyinga le Arabiya, nakone afana na Jerusalema wa namunhla, hikuva yene ni vanake vale wukazraweni.
26 Kambe Jerusalema wa le henhla antsrhunxekile, nakone hi yene mamana wezru.
27 Hikusa kutsraliwe lesvi: “Nyonxa, wene wansati wa kupfumala n’wana, wene lwangapsalikiki vana; bana nkulungwana wa kunyonxa, wene wansati lwangikisama alun’wa; hikuva vana va wansati wa kutsrhikiwa i vanyingi ngopfu kutlula va lweyi anga ni nuna.”
28 Kutani n’wine, vamakwezru, mi vana va xidumbiso kufana ni lesvi Izaki aali svone.
29 Kambe, svanga hesvi lweyi apsaliwiki hi ndlela ya ntumbuluku asunguliki kuxanisa lweyi apsaliwiki hi ndlela ya moya, hi svosvo ni svosvi.
30 Kambe, xana tsralwa dzrili yini? Dzrili: “Hlongola xitizri ni n’wana wa xone, hikusa n’wana wa xitizri angaka angadi pfindla ni n’wana wa wansati lwantsrhunxekiki.”
31 Xilesvo, vamakwezru, hine ahi vana va wansati wa xitizri, kambe hi vana va wansati lwantsrhunxekiki.